Oliy Majlis Senatında Hayal-qızlardıń jámiyettegi rolin arttırıw, gender teńlik hám shańaraq máseleleri boyınsha respublika komissiyasınıń májilisi bolıp ótti.

Senat hám usı komissiyanıń baslıǵı Tanzila Norboeva basqarǵan májiliste mámleketimiz basshısı tárepinen hayal-qızlardı kásip-óner hám isbilermenlikke oqıtıw hám bántligine járdem beriw boyınsha belgilep berilgen wazıypalardıń orınlanıwı dodalandı.
Hayal-qızlardı hár tárepleme qollap-quwatlaw, belsendiligin arttırıw ushın zárúr sharayatlar jaratılıp atırǵanı atap ótildi. Ásirese, kámbaǵallıqtı qısqartıw, hayal-qızlardıń bántligin támiyinlew hám isbilermenlikke tartıw jolında áhmiyetli ilajlar kórilmekte.
Bul baǵdardaǵı huqıqıy tiykarlardı bekkemlew maqsetinde júzge shamalas normativlik-huqıqıy hújjet qabıl etilip, orınlanıwǵa qaratıldı. Sonıń ishinde, hayal-qızlardı kásip-óner hám isbilermenlikke oqıtıw hám bántlikke járdem beriw boyınsha Senat Baslıǵınıń basshılıǵında Yangiywl rayonınıń Qirsadaq máhállesi tájiriybesi tiykarında respublikada jańa sistema jolǵa qoyıldı. Nátiyjede 2024-2025-jıllarǵa mólsherlengen ilajlar baǵdarlaması islep shıǵılıp, orınlanıwǵa qaratıldı.
Tikleniw hám rawajlanıw qorı resursınan hayal-qızlar isbilermenligi joybarların qarjılandırıw boyınsha maqsetli kórsetkishler belgilep alındı.
Xalıq banki, Mikrokreditbank, Biznesti rawajlandırıw banki arqalı hayal-qızlar isbilermenligin rawajlandırıwǵa baylanıslı 250 ksınısqa iye biznes joybarlar islep shıǵıldı.
“Joybarlar fabrikası” elektron platforması iske túsirilip, paydalanıwshılarǵa usınısqa iye biznes joybarlar, tarawlar boyınsha ajıratılatuǵın kredit shártleri menen tanısıw, kreditlerdi onlayn rásmiylestiriw imkaniyatı jaratıldı.
Belgilengen wazıypalar hám maqsetli kórsetkishlerdiń óz waqtında hám sapalı orınlanıwına, sonday-aq, orınlarda anıqlanǵan mashqalalardıń jedellik penen sheshiliwine járdem beriw maqsetinde Oliy Majlis Senatı aǵzaları, Respublika komissiyasınıń aǵzaları aymaqlarǵa, jergilikli Keńes deputatları rayon, qala hám máhállelerge biriktirildi.
Nátiyjede 2024-jıldıń ózinde hayal-qızlardıń 251,4 mıńı turaqlı jumıs orınlarına jaylastırıldı, 54,5 mıńı jámiyetlik jumıslarǵa tartıldı, 177,1 mıńı kásip-ónerge hám 147,3 mıńı isbilermenlikke oqıtıldı.
Sonıń menen birge, 55,1 hayal-qızǵa 289 milliard sum subsidiya ajıratılıp bántligi támiyinlendi. 206,6 mıń hayal-qızǵa isbilermenlik jumısın jolǵa qoyıw hám onı keńeytiw maqsetinde 3 trillion 472 milliard sum jeńillikli kredit ajıratıldı.
Májiliste ámelge asırılǵan unamlı jumıslar menen birge, hayal-qızlardıń bántligin támiyinlew boyınsha berilgen ayırım tapsırmalardıń orınlanıwı sın kózqarasta tallandı. Sonıń ishinde, ayırım máhállelerde hayal-qızlardıń turaqlı bántligin támiyinlew, jámiyetlik jumıslarǵa tartıw, máhállelerdiń drayverinen kelip shıǵıp kásip-óner hám isbilermenlikke oqıtıw talap dárejesinde emes ekenligi aytıp ótildi.
Kommerciyalıq banklerge intaker hayal-qızlardıń biznes joybarların islep shıǵıwǵa járdem beriw, jıl dawamında joybarlar ámelge asırılıwın baqlap barıw, hayal-qız isbilermenler menen turaqlı sóylesiw hám olardıń mashqalaların sheshiw áhmiyetli ekenligi atap ótildi.
Usı kemshilikler boyınsha juwapker ministrlik hám uyımlar, kommerciyalıq bankler, aymaq basshılarınıń málimlemeleri tıńlanıp, saplastırıw ilajların kóriw boyınsha tapsırmalar berildi.
Respublika komissiyası tárepinen keleshekte ámelge asırılatuǵın jumıslarǵa da itibar qaratıldı. Atap aytqanda, rásmiy emes bántlikti qısqartıw, mayıplıǵı bolǵan miynetke jaramlı jumıssız hayal-qızlarǵa itibar qaratıw, miynet bazarında talap joqarı bolǵan joqarı dáramatlı hám zamanagóy kásip-ónerge hayal-qızlardı oqıtıwǵa qamtıp alıwdı keńeytiw, aymaqlardıń ósiw drayverlerinen kelip shıǵıp, olardı isbilermenlik jumısına tartıw wazıypaları belgilendi.

N.Abduraimova, ÓzA