Nókis qalasında paydalanıwǵa jaramsız spirtli ishimlikler islep shıǵarılatuǵın jasırın cextıń jumıslarına shek qoyıldı,-dep xabar bermekte Bajıxana basqarması baspasóz xızmeti.

Qaraqalpaqstan Respublikası Bajıxana basqarması Kontrabandaǵa qarsı gúresiw bóliminiń xızmetkerleri tárepinen MQX, IIM hám “Nókis Vino zavodı” AJ xızmetkerleri menen birgelikte Nókis qalasında ótkerilgen operativ ilaj dawamında, 1983-jılı tuwılǵan, Ózbekstan Respublikası puqarası “shártli qarıydar”ǵa 100 dana 0,7 litrlik sıyımlılıqtaǵı jámi 70 litr qoldan tayarlanǵan, ulıwma akciz markalarına iye bolmaǵan “Qarataw” jazıwlı araq ónimlerin 8500000 sumǵa satqan waqtında irkiwge alındı.
Operativ ilaj dawam ettirilip, aldınan alınǵan maǵlıwmatlar tiykarında usı jasalma alkogol ónimlerin islep shıǵarıwda gúmanlanıp atırǵan shaxstıń turaq jayı tiyisli sankciya tiykarında kózden ótkerildi.
Nátiyjede, turaq jayda sapası kepillenbegen alkogol ónimlerin qoldan tayarlawǵa qánigelesken “Jasırın cex” anıqlandı. Bul jerden 645 litr etil spirti, 906 bos shiyshe, 192 “Qarataw” jazıwlı qaǵaz qutılar, 305 jańa kapsulalar, 30 litr quramında boyan tamırı bolǵan alkogol ónimleri, 1495 qaqpaq, 50, 45 litrlik akciz markasına iye bolmaǵan “Qarataw” jazıwlı alkogol ónimleri, 269 jasalma akciz markaları hám qolda tayarlanǵan spirtli ishimliklerdi tayarlawda qollanılatuǵın arnawlı qurallar ayǵaqlı dálil sıpatında alındı.
Bul jaǵday boyınsha bajıxana uyımları tárepinen sorastırıw jumısları alıp barılıp, JK niń 1861-statyası 2-bólimi boyınsha jınayat isi qozǵatıldı.

Qaraqalpaqstan xabar agentligi