Ózbekstan Respublikası Prezidenti janındaǵı Mámleketlik basqarıw akademiyası hám Malayziya Milliy mámleketlik basqarıw institutı (INTAN) qánegeleri arasında ushırasıw shólkemlestirildi.

Sóylesiw waqtında eki tárepleme birge islesiwdi keńnen jolǵa qoyıw, atap aytqanda, aldaǵı rejeler haqqında óz-ara pikir alısıldı.
INTAN 1959-jılı Port-Diksonda jaylasqan «Mámleketlik xızmetkerler ushın oqıw orayı» sıpatında shólkemlestirilgenin atap ótiw kerek. Oraydıń tiykarǵı maqseti mámleketlik xızmetkerlerdi, ásirese, ǵárezsizlikten keyin mámlekettiń rawajlanıwı mashqalaların sheshiw ushın zárúr bilim hám tájiriybege iye bolǵan kadrlar tayarlawdan ibarat edi.
1972-jılı oqıw orayı rásmiy túrde institutqa aylandırıldı hám rásmiy «Tadbiran Avam Negara» Institutı (INTAN) ataması menen tanılǵan. Statustaǵı bul ózgeris usı jańa qáliplesip atırǵan mámlekette sociallıq-ekonomikalıq rawajlanıw hám kámbaǵallıqtı joq etiwge qaratılǵan Milliy ekonomikalıq siyasat (NEP 1971-1990) sheńberinde oraydıń roli menen juwapkershiliginiń artıwı menen bir waqıtqa tuwra keldi.
INTAN Mámleketlik xızmetler departamenti menen birge islesiw mámleketlik xızmetkerlerdi tek ǵana zárúr sharayatlar hám oqıtıw menen támiyinlew emes, al keyingi bilimlendiriw hám abırayın kóteriw ushın stipendiyalar, napaqalar, grantlar hám basqalar menen támiyinlewde áhmiyetli rol atqaradı.
Sonday-aq, ushırasıwda usı jıldıń noyabr ayında Samarqand qalasında bolıp ótetuǵın YuNESKO Bas konferenciyasınıń 43-sessiyası haqqında da keń túrde maǵlıwmat berildi. Bul haqqında arnawlı izertlew hám videorolik kórsetildi hám Samarqand ánjumanına tayarlıq jumısları, maqset hám rejeler haqqında maǵlıwmat berildi.
YuNESKO Bas konferenciyasınıń 43-sessiyası Samarqand ánjumanı tariyxıy áhmiyetke iye bolıp, 2023-jılı YuNESKO tárepinen 43-sessiyasın 2025-jılı Samarqand qalasında ótkeriw boyınsha arnawlı rezolyuciya qabıl etilgen.
Ushırasıw sońında Mámleketlik basqarıw akademiyasınıń rektorı, «Еl-yurt umidi» qorınıń atqarıwshı direktorı Adham Bekmurodov INTAN húrmetli miymanları kitabına estelik qoltańba jazıp qaldırdı.

Muhayyo Toshqaraeva,
ÓzAnıń xabarshısı