Aymaqlarda isbilermenlik xızmetiniń rawajlanıwı xalıqtıń jáne de jaqsı jasawın támiyinlep, dáramatlı bolıwına tiykar jaratılmaqta. Húrmetli Prezidentimiz tárepinen qabıl etilgen párman hám qararlar bul baǵdardaǵı jumıslardıń rawajlanıwına tiykar bolmaqta.

Xalıqtıń isbilermenlik penen shuǵıllanıwında olarǵa járdemshi bolıp, qollap-quwatlap kiyatırǵan máhállelerdegi hákim járdemshileriniń ornı ayrıqsha bolmaqta. Beruniy rayonı «Obu hayot» máhállesiniń hákim járdemshisi B.Atamuratov tárepinen puqaralarǵa isbilermenlik tarawın rawajlandırıw boyınsha kórsetpeler hám járdemler berilip kelinbekte. Atap aytqanda, 2024-jılda jámi 56 puqaraǵa 1 mlrd 818 mln sum jeńilletilgen kredit qarjıları ajıratılǵan.
Máhálle turǵını N.Palvanovaǵa jeńilletilgen kredit esabınan 21 mln sum kredit qarjıları ajıratılıp, ol óz shańaraǵında sharwashılıq penen shuǵıllanıp, isbilermenlik jumısın qaramal baǵıwdan baslaǵan. Sonday-aq, 8.5 mln sum jeńilletilgen kredit esabınan qıytaq jerinde ıssıxananı iske túsirip, qıs máwsiminde ishki bazarǵa kók shóplerdi satıwǵa shıǵarmaqta.
Xalqımızdıń jaqsı kúnlerinde xızmet etiwdi niyet etken G.Abdireymova nan cexın ashıp, kúnine buyırtpa tiykarında 400-500 dana shórek nan, pátir jabıwdı jolǵa qoyǵan. 5 puqaranıń bántligin támiyinlep, jumıs alıp barıp atırǵan isbilermen aldaǵı waqıtta jumıs kólemin keńeytip, jáne de jumıssız jaslardı jumıs penen támiyinlew niyetinde. Úy sharayatında dáramat tabıw niyetinde bolǵan «Jaslar dápteri » hám «Hayal-qızlar dápteri» nde dizimde turǵan 6 puqaraǵa subsidiya tiykarında tigiw mashinaları hám kerekli ásbap-úskeneler berilip, bántligi támiyinlendi.
Máhállede xalıqtıń bántligin támiyinlewge qaratılǵan jumıslar dawam etpekte.

Qaraqalpaqstan xabar agentligi