Oliy Majlis Nızamshılıq palatasındaǵı «Milliy tiklanish» demokratiyalıq partiyasınıń májilisi bolıp ótti. Onda bir qatar nızam joybarları hám frakciya jumısına baylanıslı máseleler kórip shıǵıldı.

Dáslep májiliste frakciya aǵzalarınıń ótken bir hápte dawamında aymaqlardaǵı úyreniwleriniń nátiyjeleri dodalandı. Atap ótilgenindey, frakciya aǵzaları partiyalıq ideyalardan kelip shıǵıp, turizm, tariyxıy esteliklerdi qorǵaw hám jergilikli isbilermenlerdiń jumısı menen baylanıslı máselelerdi úyrendi. Saylawshılar menen ushırasıp, sociallıq mashqalalardı sheshiw ilajların kórdi.
Anıqlanǵan kópshilik mashqalalar orınlarda sheshilgen bolsa, ayırımları boyınsha tiyisli juwapkerlerge, ministrlikler menen uyımlarǵa deputatlıq sorawlardı jiberiw, ayırımların bolsa nızamshılıqqa ózgerisler kirgiziw arqalı saplastırıw maqsetinde usınıslar tayarlandı.
Máselen, shımbaylı Miywash Tórenazarova qaraqalpaq xalqınıń milliy otawı – «Qara úyler» ushın arnawlı bezewler tayarlaw menen shuǵıllanıp, buyırtpalar kóp bolǵanı sebepli 35 shákirtti jumısqa tartıwǵa zárúrligi bar. Biraq úyi tarlıq etip atırǵanı sebepli qosımsha imarat kerek. “Ustaz-shákirt” dástúri boyınsha óner úyrenemen degen qızlar júdá kóp. Ónermenttiń jumısın úyrengen deputat Ruslan Jumamuratov bul máseleni Shımbay rayonı hákiminiń járdemi menen sheshiwge kiristi.
Qarakól rayonı Quvvacha máhállesinde bolǵan deputat Jahangir Shirinov bolsa xalıq penen sóylesiwlerde puqaralardıń ishki jollardı ońlaw, sım aǵashlardı jańalaw, salmalardı betonlaw, sport túrleri boyınsha trener tartıw, Tashkent – Alat jónelisindegi poezd qatnawın kóbeytiw hám bul arqalı bilet jetispewshiligin azaytıw sıyaqlı máselelerdegi múrájatların tıńladı. Bildirilgen mashqalalardıń birazın sheshiwge erisildi.
Májiliste usınday ámeliy úyreniwler hár ayda shólkemlestirilip, puqaralar menen sóylesiwler ótkeriw óz nátiyjesin beretuǵını atap ótildi. Úyreniwlerdi shólkemlestiriwde partiyanıń aymaqlıq shólkemleri hám jergilikli Keńes deputatları menen birge islesiw máselelerine de itibar qaratıw zárúrligi aytıldı.
Sonday-aq, májiliste dodalanǵan nızam joybarları boyınsha tiyisli qararlar qabıl etildi.

Muhtarama Komilova,
ÓzAnıń xabarshısı