Oliy Majlis Nızamshılıq palatasınıń májilisinde deputatlar tárepinen salıq hám isbilermenlik tarawındaǵı huqıqıy qatnasıqlardı jetilistiriwge qaratılǵan nızam joybarı birinshi oqıwda kórip shıǵıldı.

– Salıq tarawındaǵı huqıqbuzarlıqlardıń aldın alıw maqsetinde usı salıq tarawındaǵı huqıqbuzarlıqlar ushın juwapkershilikti kúsheytiw, salıqlar yamasa jıyımlardı tólewden bas tartqanı ushın juwapkershilikti bekkemlewge qaratılǵan huqıqıy normalar sáwlelendirilmekte,-dedi deputat Sh.Nazarov. – Sonday-aq, sudqa shekem hám sud dodalawı dawamında jetkerilgen zıyan tolıq qaplaǵan jaǵdayda juwapkershilikten azat etiwdi, wákillikli uyımlardıń tergewge shekem tekseriw háreketlerin ámelge asırıw hám hákimshilik huqıqbuzarlıqlardı kórip shıǵıw menen baylanıslı wákilliklerin anıqlastırıwdı názerde tutıwshı ózgerisler hám qosımshalar kirgizilmekte.
Dodalawlarda deputatlar salıqlar yamasa jıyımlar tólewden bas tartıw jınayatı ushın jasırılǵan salıq hám jıyımlar muǵdarın anıqlawdıń óz aldına normaları belgilenip atırǵanına ayrıqsha itibar qarattı. Xalıq wákilleri joybarda birinshi márte jınayat islegen shaxstı, eger sud másláhátxanasına kirgenge shekem salıqlar hám jıyımlar, penyalar hám basqa da qarjılay sankciyalar túrinde mámleketke jetkerilgen zıyannıń ornın tolıq qaplasa, azat etiliwi, tergew hám sud procesinde isbilermendi qorǵawǵa Biznes-ombudsman hám Sawda-sanaat palatasın jámiyetlik qorǵawshı sıpatında tartıw tártibiniń engizilip atırǵanın qollap-quwatladı.
Bul nızam joybarınıń qabıl etiliwi salıq tarawındaǵı huqıqbuzarlıqlardıń aldın alıw, salıq túsimleriniń turaqlılıǵın támiyinlew, jeke isbilermenlik rawajlanıwı ushın teńdey báseki ortalıǵın jaratıw, olardıń nızamlı máplerin isenimli qorǵaw kepilliklerin kúsheytiwge xızmet etedi.

Muhtarama Komilova, ÓzA