Ózbekstan xalqınıń 13 millionnan aslamın 18 jasqa shekemgi balalar quraydı.

Ózbekstan xalıqaralıq huqıqtıń teń huqıqlı subyekti sıpatında óz minnetlerin tán alǵan halda, mámleket xalqınıń 35 procentine shamalası balalar quraytuǵının esapqa alıp, balanıń huqıqların támiyinlew hám qorǵaw taarwında milliy nızamshılıqtı xalıqaralıq standartlarǵa úyles túrde jetistirilip barmaqta.
YuNISEF tárepinen «2021-2025-jıllarda YuNISEF hám Ózbekstan húkimetiniń Balalardı qorǵaw baǵdarlaması» dodalawı ushın ótkerilgen ushırasıwda usı haqqında sóz boldı.
– Ózbekstanda balalardıń huqıqların qorǵaw boyınsha sistemalı jumıslar ámelge asırılmaqta, – deydi Ózbekstan Balalar ombudsmanı Surayyo Rahmanova. – Jaqın tariyxta (bunnan 6-7 jıl aldın) ápiwayı jaǵday bolǵan balalardıń miyneti, yaǵnıy olardıń atız jumıslarına, atap aytqanda, paxta terimine tartıwday unamsız jaǵdaylarǵa elimizde pútkilley saplastırıldı. Balalardıń mápine qarsı bolǵan hár qanday jaǵday qadaǵalawǵa alınıp, olardıń huqıqları támiyinlenbekte. Zárúr jaǵdaylarda balalar mámleketlik qorǵawına alınbaqta.
Ilaj mámleketlik uyımlar, puqaralıq jámiyeti institutları hám xalıqaralıq shólkemlerdiń wákilleri ushın ámeliy sóylesiw maydanı boldı. Sóylesiwler tiykarında Ózbekstanda balalardı qorǵaw baǵdarlamasına baha berilip, taraw boyınsha usınıslar islep shıǵıldı.
Ushırasıw dawamında qatnasıwshılardıń usınısları tıńlanıp, baǵdarlamanıń juwmaqlawshı tekstin jáne de jetilistiriw máseleleri dodalandı.

N.Abduraimova, ÓzA