Fevral ayı respublikamızda «Jaslar arasında náshebentlik zatlarınıń tarqalıwına qarsı gúresiw» aylıǵı dep járiyalanǵan edi.

Jaslar arasında náshebentlik zatlarınıń tarqalıwınıń aldın alıw hám salamat turmıs tárizin keńnen en jaydırıw maqsetinde, Ózbekstan mámleketlik dene tárbiyası hám sport universiteti Nókis filialı tárepinen studentler arasında «Doslıq» kanalı boyında 3 kilometrge juwırıw marafonı shólkemlestirildi.
Keskin ótken jarıs juwmaǵında, erler arasında birinshi orındı jeńil atletika qánigeliginiń 3-kurs studenti Merey Taxirjanov jeńip alıwǵa eristi. Sıylı ekinshi hám úshinshi orınlar bolsa, jeńil atletika qánigeliginiń 3-kurs studenti Islambek Ortiqov hám Adaptiv dene tárbiya hám sport qánigeliginiń 1-kurs studenti Sultamurat Qlishnazarovlarǵa nesip etti.
Al, qızlar arasında ótkerilgen jarısta bolsa, jeńimpazlıqtı voleybol qánigeliginiń 1-kurs studenti Periyzat Baltabaeva qolǵa kirgiziwge miyasar boldı.
Báygi sızıǵına ekinshi hám úshinshi bolıp jetip kelgen voleybol qánigeliginiń 1-kurs studenti Aǵziya Abıllaeva menen eskek esiw qánigeliginiń 2-kurs studenti Laura Allambergenovalar gúmis hám qola medallarına jeńip aldı
Marafonda sıylı orınlardı iyelegen studentler filial administraciyası tárepinen tayarlanǵan Diplom hám estelik sawǵaları menen sıylıqlandı.

Adilbay Orazov,
Qaraqalpaqstan xabar agentligi sholıwshısı