Sońǵı jılları elimizde Prezidentimizdiń basshılıǵında sporttı rawajlandırıwǵa ayrıqsha itibar qaratılıp, bunıń nátiyjesinde mámleketimiz sportshıları xalıqaralıq jarıslarda jeńimpazlıqtı qolǵa kirgizip kelmekte.

Usınday sportshılarımız qatarında xalıqarlıq dárejedegi sport sheberi, bir qatar jarıslardıń jeńimpazı, Parijde ótkerilgen Olimpiada oyınlarınıń qatnasıwshısı Shaxzada Ibragimova bolıp tabıladı. 2002-jılı Nókis qalasında tuwılǵan ol, kishkeneliginen sporttıń kórkem gimnastika túrine qızıǵıp, belgili trener Nigara Palvanovanıń basshılıǵında shınıǵıwlarǵa qatnasadı. Óziniń umtılıwshańlıǵı hám miynetsúygishliginiń arqasında, trenerler názerine túsken ol, kórkem gimnastika boyınsha ótkerilgen Qaraqalpaqstan hám Ózbekstan birinshiliklerinde jeńimpazlıqtı qolǵa kirgizip, mámleketimiz saylandı komandası aǵzasına aylanadı hám Ózbekstan mámleketlik denetárbiya hám sport universitetiniń Nókis filialına oqıwǵa qabıllandı.
Shaxzada Ibragimova 2021-jılı Túrkiyanıń Konya qalasında ótkerilgen Islam tilekleslik oyınlarında saylandı komanda aǵzaları menen birgelikte bir altın, eki gúmis, Tailandtıń Pattayya qalasında ótkerilgen Aziya chempionatında eki altın, bir gúmis, Tashkent qalasında ótkerilgen jáhán chempionatında bir gúmis hám altın medallardı qolǵa kirgiziwge miyasar boldı.
2024-jılı bolsa, saylandı komanda quramında Parijde ótkerilgen Olimpiada oyınlarına qatnasıwǵa eristi.
«Parij-2024» jazǵı Olimpiyada oyınları qatnasıwshısı Shaxzada Ibragimova 2024-jılı Ózbekstan mámleketlik denetárbiya hám sport universitetiniń Nókis filialın pitkerip, házirgi waqıtta mámleketimiz saylandı komandası quramında shınıǵıwlar alıp barmaqta.
Respublikamızdıń shetki aymaqlarında kórkem gimnastika sportın rawajlandırıw maqsetinde, Shaxzada oqıp tálim alǵan Ózbekstan mámleketlik denetárbiya hám sport universitetiniń Nókis filialınıń baslaması menen Nókis rayonında jaylasqan 19-sanlı ulıwma bilim beriw mektebinde «Shaxzada Ibragimova sport sheberligi dógeregi» shólkemlestirildi.
Dógerektiń ashılıw máresiminde Shaxzada Ibragimova sport sheberligi dógeregin ashqanı ushın joqarı oqıw ornı hám mektep basshılarına óz minnetdarshılıǵın bildirdi.
Ilajda mektep oqıwshıları hám olardıń ata-anaları tárepinen Shaxzada Ibragimovaǵa bir qatar sorawlar berilip, olarǵa tiyisli juwaplar aldı hám jańa dógerektiń aǵzalarına óziniń sheberligin kórsetti. Sonıń menen birge, filial tárepinen mektepke oqıw qollanbalar hám sabaqlıq kitapları tapsırıldı.
-Mektebimizde búgingi kúni 750 oqıwshı oqıydı,-deydi usı mekteptiń direktorı Qurbanay Qıdırniyazova.-Oqıwshılarımızdıń bos waqıtların mazmunlı ótkeriwi ushın kórkem gimnastika dógeregin ashıwdı maqset etken edik. Mine, búgin usı niyetimiz Ózbekstan mámleketlik denetárbiya hám sport universitetiniń Nókis filialınıń shólkemlestiriwi menen ashılmaqta. Mektebimiz jámááti, ásirese, kórkem gimnastikaǵa qızıǵıwshı oqıwshılarımız bunnan sheksiz quwanıshqa bólendi. Endi bul dógerekte filialdıń docent oqıtıwshısı Tamara Djumaniyazova hám onıń shákirtleri tárepinen oqıwshılarǵa bul sport túriniń álwan túrli sırları úyretilmekte. Aldaǵı waqıtları mektebimizden Shaxzada Ibragimovaǵa uqsaǵan chempion qızlar ósip jetilisedi dep oylayman.
Sonı aytıp ótiwimiz kerek, búgingi kúni jańadan shólkemlestirilgen «Shaxzada Ibragimova sport sheberligi dógeregi»nde 50 den aslam oqıwshılar shınıǵıwlar alıp barmaqta.

Adilbay Orazov,
Qaraqalpaqstan xabar agentligi sholıwshısı