Búgingi dáwirge kelip suwdı únemlew, onnan zamanagóy texnologiyalar járdeminde aqılǵa uǵras paydalanıw zaman talabına aylanbaqta. Bul baǵdarda suwdı basqarıw sistemaları, atap aytqanda, nasoslar ornatıw hám nátiyjeli paydalanıwdıń áhmiyeti artpaqta.

«Ózeltexsanaat» associaiciyasınıń maǵlıwmatına bola, ótken jılı elimizge sırt elden bahası 250 million AQSh dollarına teń nasoslar import etilgen. Bunnan ańlaw múmkin, ósip baratırǵan tutınıw dárejesi talaptıń jáne de artıwına sebep bolmaqta.
Sonnan kelip shıǵıp ónimdi lokalizaciyalaw, jetekshi sırt el kompaniyaları menen birge islesiw boyınsha joqarı turatuǵın mámleketlik shólkemler juwapkerleriniń qatnasıwında jumısshı topar shólkemlestirilgen.
Jumısshı topar Daniyanıń «Grundfos» kompaniyası juwapkerleri menen onlayn ushırasıw ótkerip, bul máseleni dodaladı.
«Grundfos», bul – global kólemdegi teńiz hám sanaat tarawlarına mólsherlengen nasoslar, pompalar hám suwdı basqarıw sistemaların islep shıǵarıwshı iri kompaniya sanalatuǵının maǵlıwmat ornında atap ótiw múmkin. 1945-jılı Daniyada shólkemlestirilgen bul kompaniya házir dúnyanıń 55 mámleketinde jumıs isleydi. «Grundfos» tiykarınan suwdı tasıw, tazalaw hám qadaǵalaw sistemalarında qollanılatuǵın úskeneler menen tanılǵan.
Ushırasıwda Ózbekstan Respublikası ekonomika hám qarjı ministriniń orınbasarı Ahadbek Haydarov, suw xojalıǵı ministriniń orınbasarı Zokir Ishpwlatov, «Ózeltezsanaat» associaiciyasınıń baslıǵı Mirziyod Yunusov, «Ózsuwtámiynat» AJ baslıǵı Ahmad Suvonqulov, «Grundfos» kompaniyasınıń bas atqarıwshı direktorı Hamed Heyxat, regionallıq direktorı Maykl Nielson hám «Grundfos Uzbekistan » basshısı Faruxx Salohiddinov qatnastı.
Mámleketimizde suwdı basqarıwdıń zamanagóy texnologiyaları, nasoslar islep shıǵarıwda birge islesiwdiń tiykarǵı tárepleri, joybardı ámelge asırıwda mámlekettiń járdemi hám kútilip atırǵan nátiyjeler dodalandı.

A.Rustamov, ÓzA