Ózbekstan Respublikası Ministrler Kabineti «Mámleketlik uyımlar hám shólkemlerdiń rásmiy veb-saytlarınıń jumısın jáne de jetilistiriw ilajları haqqında» qarar qabıl etti.

Oǵan muwapıq:
Mámleketlik uyımlardıń rásmiy veb-saytlarınıń jumısın «Bir ayna» principi tiykarında Ózbekstan Respublikası Húkimeti portalında jolǵa qoyıw, júrgiziw, olardaǵı málimlemeniń áhmiyetliligin hám qáwipsizligin támiyinlew hám Húkimet portalında jaylastırılatuǵın málimlemeni mámleketlik uyımlar tárepinen usınıs etiw tártibi haqqındaǵı reje;
Birden-bir platformaǵa mámleketlik uyımlardıń rásmiy veb-saytların ótkeriw rejesi tastıyıqlandı.
Qararǵa muwapıq, «UZJNFOCOM» mámleketlik málimleme sistemaların jaratıw hám qollap-quwatlaw boyınsha birden-bir integrator» juwapkershiligi sheklengen jámiyeti Birden-bir platforma operatorı esaplanadı.
2025-jıl 1-marttan baslap mámleketlik uyımlardıń rásmiy veb-saytları tek ǵana Birden-bir platformada júrgiziledi. Jańa shólkemlestirilgen mámleketlik uyımlar ózleriniń rásmiy veb-saytlarınıń jumısın shólkemlestrilgen sáneden baslap bir ay múddette Birden-bir platformada jolǵa qoyadı.
Mámleketlik uyımlardıń basshıları mámleketlik uyımlardıń rásmiy veb-saytları Birden-bir platformada júrgiziliwi ushın jeke juwapker esaplanadı.
Qararda mámleketlik uyımlar belgilengen múddetlerde óz rásmiy veb-saytlarınıń Birden-bir platformaǵa ótkeriliwin támiyinleydi,
rásmiy veb-sayt Birden-bir platformaǵa ótkerilgennen soń bir hápte múddette eski veb-saytlar domen mánzillerin jáne veb-sayt hám ondaǵı maǵlıwmatlardı saqlap qalǵan halda, Birden-bir platformadaǵı rásmiy veb-saytlar mánziline jiberiledi yamasa olardıń jumısın toqtatadı.
Maǵlıwmat ushın: Ózbekstan Respublikası Prezidentiniń «2022-2023-jıllarda málimleme-kommunikaciya texnologiyaları tarawın jańa basqıshqa alıp shıǵıw ilajları haqqında» 2022-jıl 22-avgusttaǵı PQ-357-sanlı qararına tiykarlanıp 2023-jıl 1-yanvardan baslap mámleketlik uyımlar hám shólkemlerdiń rásmiy veb-saytları hám portalların «Bir ayna» principi tiykarında óz ishine alatuǵın Ózbekstan Respublikası Húkimeti portalı birden-bir platforması iske qosılǵan edi.

ÓzA