Búgin Еlit chempionlar ligasında 7-tur oyınları bolıp ótedi.

Atap aytqanda, usı tur sheńberinde Tashkenttiń «Paxtakor» klubı Qatar mámleketiniń «Al-Garafa» komandasına qarsı oyınǵa túsedi.
Keshe usı klublardıń bas trenerleri qatnasıwında baspasóz ánjumanı bolıp ótti.
Oǵan «Paxtakor» klubınıń bas treneri Pedru Moreyra hám hújimshi Igor Sergeevler qatnastı.
– Bizler bul ushırasıwǵa jaqsı tayarlıqlar kórdik dep oylayman,-dedi Pedru Moreyra.- Shınıǵıwlarda imkaniyatımız bolǵanınsha isledik. Bizlerdi máwsimdegi birinshi rásmiy oyın kútip tur. Qarsılasımız bolsa, máwsimniń qızǵın dáwirinde. Komandamızdı keskin oyın kútip tur. Onda jaqsı oynap, unamlı nátiyjege erisiwge umtılamız..
Qarsılaslarımızdı úyrenip shıqtıq. «Al-Garafa» jaqsı futbolshılarǵa iye komanda. Olar portugaliyalı trener Pedru Martins basshılıǵında kúshli oyınlar kórsetpekte.
Al, Igor Sergeev bolsa, tómendegishe pikir bildirdi. Túrkiyada bir ay oqıw jıyının ótkerdik. Oylawımsha bizler oyınǵa fizikalıq hám ruwxıy jaqtan tayarmız. Bizler maydanda jan-tánimiz benen jaqsı oynawǵa háreket etemiz. Tashkentke unamlı nátiyje menen qaytıwdı qáleymiz.
Sonı aytıp ótiwimiz kerek, bul komandalar usı kúnge shekem 6 oyında óz-ara ushırasıp, olardıń ekewinde «Paxtakor» jeńiske erisken bolsa, birewinde teńbe-teń oynaǵan.
Al, úsh ushırasıwda «Al-Garafa» futbolshıları jeńiske erisken.
Búgingi oyın mámleketimiz waqtı menen saat 21:00 de baslanadı.

Adilbay Orazov,
Qaraqalpaqstan xabar agentligi sholıwshısı