Kópshiliktiń xabarı bolǵanınday, Ózbekstan Respublikası Prezidenti Sh. Mirziyoev tárepinen usı jıldıń 24-yanvar kúni «Nókis mámleketlik texnika universitetin shólkemlestiriw haqqında”ǵı qararı qabıl etilgen edi.

Usı qarar tiykarında, Nawayı mámleketlik kánshilik hám texnologiyalar universiteti janındaǵı Nókis kánshilik institutı hám Tashkent informaciyalıq texnologiyalar universiteti Nókis filialı negizinde jańa universitet shólkemlestirilmekte.
Bunnan gózlengen tiykarǵı maqset – injenerlik tarawında joqarı mamanlıqtaǵı kadrlar tayarlaw, bilimlendiriw, ilim hám óndiris arasında óz-ara integraciyanı jolǵa qoyıw, oqıtıw usıl hám formaların jetilistiriw, bilimlendiriw procesine innovaciyalıq texnologiyalardı engiziw arqalı bilimlendiriwdiń sapasın hám ilimiy-izertlew jumıslarınıń nátiyjeliligin arttırıw bolıp esaplanadı.
Universitetke sanaat, texnika-texnologiya, injenerlik tarawları ushın qánigeler hám ilimiy-pedagogikalıq kadrlar tayarlaw, bilimlendiriw procesine sırt ellerdiń joqarı bilimlendiriw shólkemleriniń tájiriybesi tiykarında bilimlendiriw baǵdarlamaların islep shıǵıw hám engiziw, aymaq ushın perspektivalı bolǵan kadrlar tayarlaw, zamanagóy oqıw, ilimiy hám IT laboratoriyaları bazasın jaratıw, ámeliy hám fundamental ilimiy-izertlew jumısları hám innovaciyalıq joybarlardıń nátiyjeliligin arttırıw, bilimlendiriw, ilim, óndiris arasındaǵı integraciyanı kúsheytiw sıyaqlı bir qatar wazıypalar belgilep berilmekte.
Prezidentimizdiń joqarıda atı atalǵan qararınıń jáne bir áhmiyetli tárepi sonda, universitette aldınǵı injenerlik mektebi jumısın shólkemlestiriw máselesi de orın aldı.
Atap aytqanda, onda bilim alıw ushın akademiyalıq kórsetkishleri joqarı bolǵan studentler tańlaw tiykarında tańlap alınadı hám ámeliyatqa baǵdarlanǵan arnawlı bilimlendiriw baǵdarlamaları tiykarında oqıtıladı. Oqıw dárgayında zamanagóy laboratoriyalar shólkemlestirilip, mashqalalar portfeli tiykarında ilimiy-izertlew hám tájiriybe-konstruktorlıq jumıslar alıp barıladı.
Házirgi waqıtta Nawayı mámleketlik kánshilik hám texnologiyalar universiteti janındaǵı Nókis kánshilik institutı hám Tashkent informaciyalıq texnologiyalar universiteti Nókis filialında bilim alıp atırǵan barlıq studentler oqıwın Nókis mámleketlik texnika universitetinde dawam ettirip, pitkeriwshi kurs studentlerine universitet diplomı beriledi.
Mámleketimiz basshısı tárepinen qabıl etilgen bul qarar tek ǵana Qaraqalpaqstannıń emes, al Jańa Ózbekstannıń ekonomikalıq-sociallıq rawajlanıwın támiyinlew hám ilimiy potencialın bunnan bılay da arttırıwda áhmiyetli orın iyeleydi.
Respublikamızda jańadan shólkemlestirilip bul universitette tálim-tárbiya alıp atırǵan jaslar erteńgi kúni elimizdiń xalıq xojalıǵı ushın jetik qánigeler bolıp jetilisip, ózleriniń iyelegen bilimi menen mámleketimizdiń rawajlanıwına óz úleslerin qosadı, dep isenemiz.

Atabek Kaipbergenov,
Nawayı mámleketlik kánshilik texnologiyaları universiteti janındaǵı Nókis kánshilik institutı direktorı, t.i.d. professor.
Qaraqalpaqstan xabar agentligi