Niderlandiyanıń Veyk-an-Zee qalasında eki hápte dawam etken shaxmat boyınsha «Tata Steel Chess-2025» turniri óz juwmaǵına jetti.

Keshe ótkerilgen 13-turda «Masters» toparında jetekshilerdiń biri bolıp kiyatırǵan Nodirbek Abdusattorov hindstanlı Pentala Harikrishna menen teńbe-teń oynap, bir upayǵa iye boldı hám jarıstı 3-orın menen juwmaqlawǵa májbúr boldı. Eger, Nodirbek usı ushırasıwda jeńip shıqqanında chempionlıq ushın tay-brek ushırasıwlarında qatnasıw imkaniyatına iye bolar edi.
Al, turnir jeńimpazlıǵı bolsa, 8,5 upaydan toplaǵan hindstanlı Gukesh hám Rameshbabu arasında ótkerilgen tay-brek bellesiwinde anıqlandı hám Pragnanandha 2:1 esabında jeńiske eristi.
Solay etip, «Tata Steel Chess-2025» turnirinde Rameshbabu Pragnanandha chempionlıqtı jeńip alǵan bolsa, Gukesh ekinshi, Nodirbek Abdusattorov 8 upay menen sıylı úshinshi orındı iyelewge miyasar boldı.
«Chellenjer» toparında qatnasıp atırǵan Nodirbek Yakubboev bolsa, jarıstıń sońǵı turların kóterińki ruwxta ótkerip, 8 upay menen qosımsha kórsetkishlerge bola, tórtinshi orındı iyelewge eristi.

Adilbay Orazov,
Qaraqalpaqstan xabar agentligi sholıwshısı