Qaraqalpaqstan Respublikası Mektepke shekemgi hám mektep bilimlendiriwi ministrliginde Ózbekstan «Milliy tiklanish» demokratiyalıq partiyası Qaraqalpaqstan Respublikalıq keńesiniń plenumı bolıp ótti.
Onda partiyanıń Qaraqalpaqstan Respublikası Keńesi aǵzaları, qalalıq hám rayonlıq Keńesleriniń basshıları, Qaraqalpaqstan Respublikası Joqarǵı Keńesi hám xalıq deputatları jergilikli Keńeslerindegi deputatlıq toparlarınıń aǵzaları, partiya belsendileri hám ǵalaba xabar qurallarınıń wákilleri qatnastı.
ÓzMTDP Qaraqalpaqstan Respublikalıq Keńesiniń baslıǵı T.Romanov partiyanıń Qaraqalpaqstan Respublikalıq Keńesi hám Joqarǵı Keńestegi partiya frakciyasınıń ótken dáwir ishinde ámelge asırǵan jumısları haqqında esabat berdi.
Plenumda 2024-jılı 27-oktyabrde bolıp ótken ótken saylawlardıń nátiyjeleri hám barlıq dárejedegi partiya shólkemleri hám deputatlıq birlespeleriniń 2024-jıldaǵı jumısınıń juwmaqları hám 2025-2029-jıllarǵa mólsherlengen Saylawaldı baǵdarlamasında belgilengen wazıypalardıń orınlanıwın támiyinlew, sonday-aq, partiyanıń Qaraqalpaqstan Respublikalıq Keńesi hám Joqarǵı Keńesindegi partiya frakciyasınıń Is-rejesin tastıyıqlaw máseleleri dodalandı.
Atap ótilgenindey, ÓzMTDP Keńesine ótken saylawlarda Oliy Majlis Nızamshılıq palatasına proporcional saylaw túri boyınsha 2, Joqarǵı Keńeske 9 hám Xalıq deputatları qalalıq hám rayonlıq Keńeslerine 61 deputat, jámi 72 deputat saylandı. Sonday-aq, partiyadan Senatqa 1 talaban aǵzallıqqa saylandı.
– Búgingi kúnge kelip partiyanıń Qaraqalpaqstan Respublikası boyınsha baslanǵısh partiya shólkemleriniń sanı 680, partiya aǵzalarınıń sanı bolsa 51 mıńnan arttı. Turaqlı komissiya májilislerine 19 másele, jergilikli Keńeslerdiń sessiyalarına 15 baslama alıp shıǵıldı, – dedi ÓzMTDP Qaraqalpaqstan Respublikası Keńesiniń baslıǵı Tájibay Romanov óziniń shıǵıp sóylegen sózinde.
Jámlespegen jaslardıń bántiligin támiyinlew, olardı kásip-ónerge baǵdarlaw, «Ustaz-shákirt» dástúrlerin rawajlandırıw maqsetinde máhállelerde jasap atırǵan jámlespegen jaslar, kem támiyinlegen shańaraqlardıń perzentleri, waqıtsha jumıssız hayal-qızlarǵa qosımsha biypul kásip-óner úyretiw ushın «Xızmet-biyminnet» joybarı sheńberinde ótken jıl dawamında Qaraqalpaqstan Respublikası boyınsha 13 biypul oqıw kursları shólkemlestirilgen. Oqıw kurslarında 89 jasqa hám hayal-qızlarǵa qosımsha biypul bilim hám kásip-óner úyretilgen. Usı biypul kurslardı 2025-jılda da dawam etiw belgilep alındı.
Plenum juwmaǵında dodalanǵan máseleler boyınsha tiyisli qarar qabıl etildi.
Qaraqalpaqstan xabar agentligi