31-yanvar kúni Evropa chempionlar ligasınıń pley-off oyınlarına shek taslandı.

Oǵan bola, quramında ózbekstanlı Abduqodir Husanov bar «Manchester Siti» klubı Madridtiń «Real» klubı menen oynaytuǵın boldı.
Sonday-aq, bul basqıshta Belgiyanıń «Bryugge»si Italiyanıń «Atalanta»sı menen, Portugaliyanıń «Sporting»i Dortmundtıń «Borussiya»sı, Shotlandiyanıń «Seltik»i Myunxenniń «Bavariya»sı menen oynaytuǵın boldı.
Sonıń menen birge, bul turda Italiyanıń «Yuventus» hám «Milan» klubları Niderlandiyanıń «PSV» hám «Feynord» klubları menen bellesse, «Monako» Portugaliyanıń «Benfika»sı, Franciyanıń jáne bir klubı «Brest» Parijdiń «Pari Sen Jermen»i menen kelesi basqıshqa shıǵıw ushın óz-ara oyınǵa túsedi.
Bul komandalardıń dáslepki oyınları 11—12-fevral, juwap ushırasıwları 18—19-fevral kúnleri ótkerilip, jeńimpazlar anıqlanǵannan soń 1/8 final ushın shek taslanadı.

Adilbay Orazov,
Qaraqalpaqstan xabar agentligi sholıwshısı