Aldın xabar bergenimizdey, kúni keshe Prezidentimizdiń basshılıǵında qıytaq jerde hám ijaraǵa berilgen egislik jerlerde dáramatlı ónim jetistiriwdiń jańa sisteması boyınsha májilis ótkerilip, onda respublikamızdıń shetki aymaqlarınıń biri bolǵan Qaraózek rayonındaǵı Mádeniyat APJ aymaǵında jasawshı qıytaq jer iyesi Genjemurat Turdımuratov «Dwstlik» ordenine múnásip dep tabılǵan edi.

Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qaraózek rayonında Prezidentimizdiń pármanı menen «Dwstlik» ordenin óz iyesine saltanatlı túrde tapsırdı. Óz gezeginde, G.Turdımuratov azǵana miynetine bolǵan ayrıqsha itibar ushın el basshımızǵa tereń minnetdarshılıǵın bildirdi.
Aytıp ótiw orınlı, ol Qaraqalpaqstan sharayatında eń arqa aymaqlardıń birinde azǵana jerden mol ónim alıwdı jolǵa qoya alǵan miynetkesh insanlardıń biri. Ózine tiyisli 29 sotix jer maydanında 2019-jıldan berli ıssıxanada awıl xojalıǵı ónimlerin jetistiriw menen shuǵıllanıp kelmekte. Dáslep, óz jumısın 1 sotixlı ıssıxanadan baslaǵan bolsa, búgingi kúnde 8 sotixlı ıssıxanada ovosh ónimleri hám nállerin jetistirip atır. Isbilermenlik jumısı ushın ajıratılǵan 33 mln. sumlıq jeńilletilgen kredit esabınan shólkemlestirilgen ıssıxanalarında 8 puqaranıń bántligin támiyinlep, bir neshe márte ónim alıw arqalı dáramatlı bolıwına járdem bermekte.
Álbette, G.Turdımuratovtay qıytaq jer iyeleriniń azǵana jer maydanlarınan nátiyjeli paydalanıwı hám óz shańaraǵı dáramatın arttırıw baǵdarındaǵı miynetleri kópshilikke úlgi bola aladı, desek aljaspaǵan bolamız.

Qaraqalpaqstan xabar agentligi.