Búgingi kúnde Moynaq rayonında da keń kólemli qurılıs, ońlaw hám abadanlastırıw jumısları dawam etpekte.
Bul jumıslardıń nátiyjeligin jáne de arttırıw, jedellestiriw, sonday-aq, sapalı orınlanıwın támiyinlew maqsetinde Qaraqalpaqstan Respublikası Bajıxana basqarmasınıń baslıǵı Z.Turdaliev hám rayon hákimi B.Meńlibekovlardıń basshılıǵında jáne bir kompleksli ilajǵa start berildi.
Juwapker sektor basshıları, aymaq turǵınları, nuraniylar, veteranlar hám barlıq mákeme-shólkemlerdiń juwapkerleriniń qatnasıwında ótkerilgen májiliste rayondı sociallıq-ekonomikalıq rawajlandırıw, xalıqtıń kewil-keypiyatına tásir etip atırǵan máhállelerdegi infrastrukturalıq, sociallıq hám basqa da mashqalalarǵa sheshim tabıw, isbilermenlikti jáne de rawajlandırıw sıyaqlı áhmiyetli máseleler sóz etildi.
Hár bir basshı ózine bekitilgen wazıypaǵa ayrıqsha juwapkershilik penen qarawı kerekligi, xalıq iygiligi jolındaǵı bul jumıslar puqaralardıń abadan turmısın támiyinlewge xızmet etetuǵınlıǵı atap ótilip, usı kúnniń ózinde keń maydanda qatar turǵan texnikalar sap tartıp topıraq jollardı qum-shaǵıl tas aralaspalı jollarǵa aylandırıw, keń kólemli abadanlastırıw jumısların alıp barıw baǵdarındaǵı ámeliy jumıslar baslap jiberildi.
Abadanlastırılıwı belgilengen kóshelerde elektrikler sım tartsa, jolshılar iri júk transportları tárepinen jollarǵa tógilgen qum-shaǵıl tas aralaspasın jayıp tegislemekte, basqa xızmet tarawları da ózlerine belgilengen wazıypalardı orınlawdı baslap jiberdi.
Rayonda baslanǵan keń kólemli abadanlastırıw jumısları dawam etpekte.

Á.Jiyemuratov,
Qaraqalpaqstan xabar agentligi