Bul jerden derlik hár kúni ótemiz. Kóbinese xızmet babında, geyde qádirdanlardı joqlap, hal-jaǵday soraymız, teberik orınlardı zıyarat etemiz. Tashkenttiń qaq júreginde qurılǵan Ózbekstan islam civilizaciyası orayına tiyisli sawlatlı kompleks hár insannıń – meyli jerleslerimiz, meyli dúnyanıń arǵı múyeshinen kelgen turist bolsın, hámmesiniń itibarına, háwes etiwine, tolqınlanıwına sebep bolıp atırǵan biytákirar, shıraylı, ullı, payızlı jer.
Prezidentimiz Shavkat Mirziyoevtiń baslaması menen boy kótergen bul kompleks tiykarınan mámleket basshısınıń xalıqshıl, jaqsılıq hám sawap, ibrat penen suwǵarılǵan baslamasınıń jemisi. Sebebi, ázelden xalqımızdıń qálbinde islam aǵartıwshılıǵı jasap kelgen. Bul jaqtılıq nurı eń awır sharayatlarda da adamlardıń oy-sanasın, júregin hasla tárk etpegen. Hátteki burınǵı awqam dáwirinde de hadal iyman-isenim, islam nurı ata-babalarımızǵa hámiyshe joldas bolǵan.
Úylerdiń tórinde qásterlep saqlanǵan Quranı Kárim, dasturxan basındaǵı pátiyalar, sawaplı dástúrler, jumıslardıń dawamlılıǵı bunıń ayqın dáliyli bolıp tabıladı. Analarımız ómiriniń payanında da muqaddes kitaplardı oqıwǵa kirisken. Óytkeni, Ayat káliymalarındaǵı káramatlı qatarlar hár qanday ǵam-qayǵıǵa, táshiwishke tolı kewillerge qáterjamlıq, tınıshlıq baǵıshlaydı. Aytpaqshı bolǵanımız, islamnıń ómir baǵıshlaytuǵın quwatınan, nurınan xabardan bolıw bizlerdi bir sátke bolsa da, sirá tárk etpegen.
Prezidentimiz Shavkat Mirziyoevtıń ideyası hám baslaması tiykarında bunnan bir neshe jıllar burın irge tası qalanǵan Ózbekstan islam civilizaciyası orayı tek ǵana ullı ata-babalarımızdıń miyrası menen maqtanıw emes, al rawajlanıwǵa bet burǵan jańa Ózbekstanımızda Úshinshi Renessans tiykarların qurıwday iygilikli maqsetlerdi gózlewi menen qádirli.
Úsh qabatlı, oǵada kórkem bul imarat tolıq qurılǵanı menen birge, ondaǵı ilimiy-aǵartıwshılıq kontentler, ekspoziciya naǵıslanıp, hár tárepleme tereń ilimiy-fundamental tiykarda qáliplestirilgenin aytıw kerek. Bul jerde “Islamnan burıngı civilizaciyalar”, “Birinshi Renessans dáwiri”, “Ekinshi Renessans dáwiri”, “Ózbekstan XX ásirde”, “Jańa Ózbekstan – jańa Renessans” sıyaqlı bólimler shólkemlestiriledi.
2024-jılı elimizde bolıp ótken xalıqaralıq forumlar, ánjumanlar, Mádeniy miyras háptelikleri, sóylesiwler, másláhátlesiwler kompleks fondın hár tárepleme, tiykarlı, qızıqlı jetik-puqta jaratıw ushın jaqsı tiykar boldı.
Mámleketimizdiń din tarawı bilimdanları, ilimpazlar, ulamalar, tariyxshılar, restavratorlar, muzeytanıwshılılar, kitapxanashılar, baspa xızmetkerleri hám kalligraflar, dizaynerler, derektanıwshılar, sanlı texnologiyalardıń bilimdanları, xudojnikler, sheber usta hám ónermentler, injenerler bunday iygilikli iske óz ideya hám usınısları, pikirleri, dóretiwshilik joybarları menen múnásip úles qostı.
Házirgi waqıtta elimizdiń ilimpazları menen birge, eń jetekshi mámleketlerdiń ilimpazları hám qánigeleri, iri universitetler, muzey hám kitapxanalardıń, ilimiy oraylardıń wákilleri mámleketimiz basshısınıń Ózbekstan islam civilizaciyası orayı ilimiy ekspoziciyasınıń koncepciyasın jaratıwǵa baylanıslı baslaması átirapında jedel birlesti.
Bul kompleksti xalqımızǵa tolıq usınıw ideyası Prezidentimizdi turaqlı oylandırıp, onıń turmısqa engiziliwi jolında turaqlı ámeliy ǵamqorlıq hám itibar kórsetip atırǵanı elimizde xalıqtıń aǵartıwshılıǵı, ruwxıy rawajlanıw máseleleri hár qanday tarawlardan ústin, áhmiyetli ekenin kórsetpekte.
Mámleketimiz basshısınıń 29-yanvar kúni úlken hám siyrek ushırasatuǵın joybar – Islam civilizaciyası orayında alıp barılıp atırǵan jumıslar menen tanısıwı waqtında elimizde islam mádeniyatı menen baylanıslı eski tariyx bir jerde – Ózbekstan islam civilizaciyası orayında jámlesetuǵının ayrıqsha atap ótti.
Bul teberik kompleks jańa Ózbekstannıń ullı dóretiwshilik nıshanı, biytákirar ruwxıy-aǵartıwshılıq miyrasımız, bay tariyxımız, keleshekke umtılıp atırǵan ana Watanımızdıń ózine tán aynasına aylanatuǵınına gúman joq.

Nazokat USMANOVA,
ÓzAnıń xabarshısı