Ózbekstan hám Ázerbayjan puqaralarına sırt elge shıǵıw pasportın almastan turıp shegaranı kesip ótiw imkaniyatın beretuǵın ID –kartalardı óz-ara tán alıw máselesin dodaladı. Bul haqqında «Dunyo» málimleme agentligi xabar berdi.

Oǵan bola, Ózbekstan elshixanasınıń járdeminde Ózbekstan hám Ázerbayjannıń tiyisli ministrlik hám uyımlarınıń wákilleri arasında eki mámleket puqaralarınıń ID-kartaların shegaradan ótiw ushın rásmiy hújjet sıpatında tán alıw imkaniyatın dodalawǵa baǵıshlanǵan onlayn ushırasıw shólkemlestirilgen.
Tárepler puqaralardıń háreketin ápiwayılastırıw, eki tárepleme qatnasıqlardı bekkemlew hám migraciya siyasatı tarawındaǵı birge islesiwdi keńeytiwge qaratılǵan bul qádem úlken áhmiyetke iye ekenligin atap ótti.
Bunnan tısqarı, ID-kartalardan paydalanıw Ózbekstan hám Ázerbayjan puqaralarına sırt el pasportın almay turıp shegaranı kesip ótiw imkaniyatın beredi. bul Bolsa sayaxat etiw qolaylıǵın arttıradı hám mámleketler arasındaǵı integraciyanı bekkemleydi.
«Usı qarardıń qabıl etiliwi Ózbekstan hám Ázerbayjan arasındaǵı sawda-ekonomikalıq, mádeniy hám turistlik qatnasıqlardı rawajlandırıwǵa unamlı tásir kórsetiwi kútilmekte», – delinedi xabarda.

Qaraqalpaqstan xabar agentligi