Elimizde “Insan qádiri ushın” principi tiykarında xalqımızdıń abadan turmısta jasawı ushın keń kólemli reformalar ámelge asırılıp, nátiyjede milliy mámleketshiligimizdiń tiykarı bekkemlenip, hár bir puqara hám shańaraqtıń abadanlıǵı, nızam ústinligi, insan huqıqları menen erkinlikleri hám mápleri támiyinlenbekte.

Xalqımızdıń ádil sudlawǵa bolǵan isenimin bekkemlew, olardı sud-huqıq máselesinde qıynap júrgen mashqalalarǵa ádil sheshim tabıw maqsetinde orınlarda sud basshıları tárepinen kóshpeli qabıllawlar dawam etpekte.
Maqset – puqaralardıń awırın jeńil etiw, waqtın únemlew, eń baslısı esik qaǵıp sudpa-sud áwere bolıp júriwiniń aldın alıw.
Qońırat rayonlar aralıq ekonomikalıq sudı baslıǵı Q.Xojamuratov hám Puqaralıq isler boyınsha Qońırat rayonlar aralıq sudınıń baslıǵı E.Eshmuratovlar tárepinen Qanlıkól rayonındaǵı Sarı altın awıl puqaralar jıyını turǵınları ushın kóshpeli qabıllaw shólkemlestirildi.
Onda aymaq turǵınları kommunal xızmetler boyınsha belgilengen járiyma muǵdarın azaytıw, nekeden ajırasıw, aliment óndiriw, turaq jayǵa iyelik huqıqın belgilewge baylanıslı máselelerde múrájat etti.
Hár bir múrájat dıqqat penen tıńlandı. Sebebi, sudqa baylanıslı múrájatler múddet hám waqıt talap etetuǵın bolǵanlıqtan sol kúnniń ózinde sheshilmewi múmkin, biraq olar qatań sud basshıları tárepinen qadaǵalawǵa alındı. Shólkemlestiriwshiler tárepinen múrájatlerdiń nızamlı sheshim tabıwı boyınsha kórsetpeler hám huqıqıy másláhátler berildi.
Sud basshıları tárepinen bul baǵdardaǵı ilajlar orınlarda dawam etpekte.

Qaraqalpaqstan xabar agentligi