Usı abıraylı ánjuman tek Ózbekstan da emes, al Oraylıq Aziyada birinshi márte ótkerilmekte.

Ózbekstan Respublikası Prezidenti Shavkat Mirziyoevtiń usınısına bola, Parlamentleraralıq awqamnıń 150-yubiley Assambleyası 2025-jıl 5-9-aprel kúnleri Ózbekstanda bolıp ótedi.
Bizge belgili, 190ǵa shamalas mámleket parlamentin birlestirip kiyatırǵan Parlamentleraralıq awqam assambleyası jılına eki márte ótkeriledi. Bul ilaj tek parlamentarizm hám turaqlı rawajlanıwdıń unamlı tájiriybesi joqarı bolǵan mámleketlerde ǵana ótkeriledi.
Házirgi waqıtta mámleketimizde usı abıraylı ánjumanǵa tayarlıq jumısları dawam etpekte.
Oliy Majlis Senatında Parlamentleraralıq awqamnıń 150-yubiley Assambleyasın ótkeriw boyınsha shólkemlestiriw komitetiniń májilisi bolıp ótti.
Senat Baslıǵı Tanzila Norboeva basqarǵan májiliste deputatlar, senatorlar, húkimet wákilleri, ministrlik hám uyımlar, Tashkent qalası hákimligi basshıları hám shólkemlestiriw komitetiniń basqa da aǵzaları qatnastı.
Májiliste Ózbekstannıń Parlamentleraralıq awqamǵa aǵzalıǵı 2017-jılı qayta tiklengeni atap ótildi. Ótken qısqa dáwir ishinde mámleketimiz parlamentarizm hám turaqlı rawajlanıw tarawında oǵada úlken tájiriybege eristi. Respublikamızdıń tabısları iri xalıqaralıq shólkemler hám sırt mámleketler tárepinen ayrıqsha atap ótilmekte.
Parlamentleraralıq awqamnıń 150-Assambleyasınıń Ózbekstanda bolıp ótiwi tariyxıy waqıya bolıp esaplanadı, sebebi bunday ilaj Oraylıq Aziya regionında birinshi márte ótkerilmekte.
Májiliste Ózbekstanda bolıp ótetuǵın usı Assambleyanıń tiykarǵı teması «Sociallıq rawajlanıw hám ádillik ushın parlament háreketi» dep atalǵanı, onıń sheńberinde pútkil dúnya parlamentleri xalıqtı sociallıq qorǵaw, kámbaǵallıqtı qısqartıw, huqıq ústinligin támiyinlew baǵdarında ámelge asırılıp atırǵan reformalar hám óz tájiriybeleri menen ortaqlasadı.
Sonday-aq, bir hápte dawamında Parlamentleraralıq awqamnıń komitetleri tárepinen insan huqıqların qorǵaw, gender teńlikti támiyinlew, ilim hám texnologiya, jaslar máselelerine baǵıshlanǵan túrli ilajlardıń shólkemlestiriliwi rejelestirilmekte.
Óz gezeginde, Senat Baslıǵı usı tariyxıy hám abıraylı ánjumanda barlıq birdey belsendi bolıwı kerek ekenligi hám onı joqarı túrde shólkemlestiriw boyınsha bir qatar wazıypalarǵa toqtap ótti.

N.Abduraimova, ÓzA