Búgin Ózbekstan Respublikası Prezidenti basshılıǵında qıytaq jerde hám ijaraǵa berilgen diyqanshılıq jerlerinde dáramatlı eginler jetistiriwdiń jańa sisteması boyınsha májilis ótkerildi.

Májiliste mámleketimiz basshısı aymaqlardaǵı tájiriybeli diyqanlar hám qıytaq jer iyeleri menen sóylesti. Onda qıytaq jerindegi ıssıxanada jılına 4 márte ónim jetistirip, joqarı dáramat alıp atırǵan qaraqalpaqstanlı Genjemurat Turdımuratov «Dwstlik» ordeni menen sıylıqlandı.

Men Genjemurattı 25 jıldan beri tanıyman. Qaraózektiń Mádeniyat elatında tuwılıp, kamalǵa kelgen ol, 1997-1999-jılları Armiya qatarında jigitlik wazıypasın ótep qaytqannan soń, 2000-2003-jılları Nókis avtomobil jolları kolledjinde tálim aldı.
Sońınan aqmańǵıtlı Gúlnara menen turmıs qurıp, bala-shaǵalı bolǵannan soń, xojalıq baǵıw hám óz aldına otaw tigiw ushın bir neshe jıllar dawamında Qazaqstan hám Rossiya Federaciyalarında jumıs islep qayttı. Burınnan tanıytuǵın dostımız bolǵanlıqtan onıń menen jiyi-jiyi ushırasıp, gúrrińlesemiz. Genjemurat usınday payıtları óziniń gerbish zavodlarda, hár qıylı ıssıxanlarda jumıs islep, óner úyrenip atırǵanın aytqan gezleri, oǵan tabıslar tileytuǵın edim.
Ol sırt ellerde úyrengen tájiriybelerin turmısqa engizip, 2021-jıldan berli, úy aldı egislik jerine ıssıxana qurıp, onda palız ónimlerin jetistirip kiyatır.
-Diyqanshılıqqa burınnan qızıǵıp, awılda egislik jerlerge egin egetuǵın edim,-deydi ol.-2021-jılı úy aldı qıytaq jerine ıssıxana qurıw boyınsha usınısımdı aymaqtaǵı hákim járdemshisi Ziywar Jaqsımovaǵa bildirgenimde, ol meniń bul baslamamdı qollap-quwatlap, jumıs baslawım ushın «Xalıq bank»tiń rayonlıq filialınan 15 mln sum jeńilletilgen kredit alıwıma járdemlesti. Bunıń nátiyjesinde úy aldına 1,5 sotıxlı ıssıxana qurdım. Nátiyjesi jaman emes. 2022-jılı bankten alǵan kreditimdi tolıq tólep qutıldım hám jáne bir márte usı bankten taǵı bir ıssıxana hám kerekli ásbap-úskenelerdi satıp alıw ushın 33 mln sum jeńilletilgen kredit aldım.
Hár jıl sayın ıssıxanlarda pomidor, qıyar, klubnika hám basqa da ovosh-palız ónimlerin jetistirip, onnan 100 million sumnan aslam dáramat alıp kelmektemen.
Mine búgin Prezidentimizdiń basshılıǵında ótkerilgen videoselektorda meni «Dwstlik» ordeni menen sıylıqladı. Bunıń ushın Jurtbasshımızǵa, respublikamız basshılarına ózimniń sheksiz minnetdarshılıǵımdı bildiremen hám ózime bildirilgen isenimdi tolıq aqlayman.
Genjemurat Turdımuratov 24 sotıx qıytaq jeriniń 8 sotıxına ıssıxana qurıp, qalǵan jerlerinde miywe, ovosh-palız daqılların egip, onnan mol zúráát jetistirip kelmekte. Sonıń menen birge, ol óz úyinen «jas ıssıxanshılar mektebi»n ashıp, onda usı tarawǵa qızıǵıwshılıǵı bar awıllaslarına óziniń iyelegen bilim hám tájiriybelerin úyretip kelmekte.
-Jaslarǵa teoriyalıq bilimler menen birge, úy aldı ıssıxanamızda ámeliy sabaqlar berip atırman,-deydi Genjemurat óz sóz dawam etip.-Bunıń nátiyjesinde sońǵı jılları awılımızda ıssıxana menen shuǵıllanıwshı jaslar kóbeymekte. Bul bolsa, meni jáne de alǵa qaray umtıldıradı.

Adilbay Orazov,
Qaraqalpaqstan xabar agentligi sholıwshısı