Shomanay rayonlıq Mektepke shekemgi hám mektep bilimlendiriwi bólimine qaraslı 1-sanlı ulıwma orta bilim beriw mektebinde jınayatshılıq hám huqıqbuzarlıqtıń aldın alıw boyınsha túsinikler berip barıw maqsetinde “Hákimshilik jaza hám onıń túrleri” atamasında ushırasıw bolıp ótti.

Ushırasıwǵa Jınayat isleri boyınsha Shomanay rayonı sudınıń baslıǵı M.Bayniyazov, profilaktika-inspektorları hám usı mektepte bilim alıp atırǵan pitkeriwshi klass oqıwshıları qatnastı.
Sud baslıǵı tárepinen oqıwshı jaslarǵa hár qanday jámiyettiń turaqlı rawajlanıwında, ásirese, elimizde húkim súrip turǵan tınıshlıqtı bekkemlew, adamlar arasında óz-ara tatıw turmıstı támiyinlewde nızam ústinligi hám huqıqbuzarlıqlardıń aldın alıw ayrıqsha áhmiyetke iye ekenligi túsindirildi. Sebebi, jınayatshılıq hám huqıqbuzarlıqlar tek ǵana jámiyettiń barlıq tarawlarına unamsız tásir etip qoymastan, al adamlardıń óz-ara qatnasıqların buzadı. Sonlıqtanda, aymaqlarda tártip-intizam hám qáwipsizlikti támiyinlew ushın jınayatshılıq hám huqıqbuzarlıqtıń aldın alıwǵa qaratılǵan kompleksli ilajlar sisteması islep shıǵılǵan. Bunda ásirese, orınlarda tiyisli taraw qánigeleri menen birgelikte turaqlı túrde ótkerilip atırǵan usı mazmundaǵı ilajlar da ayrıqsha orın tutadı.
Bunnan soń, hákimshilik huqıqbuzarlıqlar, onıń túrleri hám jaza tayınlaw tiykarları haqqında da keń túrde maǵlıwmat berildi.
Ushırasıw dawamında oqıwshılar taraw qánigelerinen ózlerin qızıqtırǵan sorawǵa juwap aldı.

Qaraqalpaqstan xabar agentligi.