Ózbekstan Respublikası Sawda-sanaat palatası Qaraqalpaqstan Respublikası basqarmasında Salıq kodeksine kirgizilgen ózgerisler hám 2025-jılı salıq siyasatındaǵı jańalıqlardı isbilermenler, ǵalaba xabar qurallarınıń wákilleri hám keń jámiyetshilikke túsindiriw maqsetinde seminar shólkemlestirildi.

Ilajda Qaraqalpaqstan Respublikası Salıq basqarmasınıń baslıǵı Xalmurza Bekchanov, Sawda-sanaat palatasınıń baslıǵı Kazbek Artikov, taraw qánigeleri, isbilermenler hám xalıq wákilleri qatnastı.
Seminarda «Salıq hám byudjet siyasatınıń 2025-jılǵa mólsherlengen tiykarǵı baǵdarları qabıl etilgeni múnásibeti menen Ózbekstan Respublikasınıń ayırım nızam hújjetlerine qosımsha hám ózgerisler kirgiziw haqqında»ǵı Nızamı menen salıq sistemasına kirgizilgen áhmiyetli jańalıqlar boyınsha tolıq málimleme berildi.
Isbilermenlik subyektlerine jáne de qosımsha qolaylıqlar jaratıw, ekonomikalıq belsendilikti arttırıw hám salıqlardıń nátiyjeliligin támiyinlew maqsetinde Salıq kodeksiniń 37 statyasına, sonıń menen birge, Byudjet kodeksine ózgeris hám qosımshalar kirgizilgen.
Sonıń ishinde, mámleketlik emes mektepke shekemgi hám ulıwma orta bilimlendiriw shólkemleri 2030-jıl 1-yanvarǵa shekem sociallıq salıqtan tısqarı barlıq túrdegi salıqlardan azat etiledi.
IT sektorın rawajlandırıwǵa qosımsha imkaniyatlar jaratıldı. Yaǵnıy IT-park rezidentlerine qosımsha qun salıǵınan tısqarı barlıq salıqlardı tólewden azat etiw jeńilligi 2040-jılǵa shekem sozıldı.
Jaratılıp atırǵan bunday imkaniyatlar isbilermenler ushın qolaylı ortalıq jaratıwı arqalı xalıqtıń abadanlıǵın arttırıwǵa múmkinshilik tuwdıradı.
Seminarda isbilermenler, ǵalaba xabar qurallarınıń wákilleri hám keń jámiyetshilik usı baǵdarlar boyınsha pikirlerin bildirip, sorawlarına tolıq juwap aldı.

Qaraqalpaqstan xabar agentligi