Ámiwdárya rayonındaǵı sanatoriya baǵında Agrosanaattı rawajlandırıw agentliginiń Qaraqalpaqstan Respublikası bóliminiń bas qánigesi B.Axmetov, taraw qánigeleri hám fermer xojalıqları basshılarınıń qatnasıwında kórgizbeli seminar bolıp ótti.

Seminar dawamında Agrosanaattı rawajlandırıw agentliginiń rayondaǵı qánigeleriniń kórsetpelerine muwapıq, miyweli baǵlardı qayta islew hám agrotexnikalıq ilajlar sheńberinde eń áhmiyetli orınlanatuǵın jumıslar atap ótildi.
Atap aytqanda, miyweli tereklerge durıs qayta islew – tereklerdiń ónimdarlıǵın arttırıw hám olardıń jaqsı rawajlanıwın támiyinlew maqsetinde shaqaların qalay qáliplestiriw kerek ekenligi, zamanagóy agrotexnikalıq usıllardı qollanıw – suwdı únemlewshi texnologiyalar, topıraq ónimdarlıǵın saqlaw hám jaqsılaw boyınsha innovaciyalıq qatnaslar, zıyankeslerge qarsı gúresiw – ekologiyalıq taza hám nátiyjeli qorǵaw ilajları, biologiyalıq hám ximiyalıq usıllardan aqılǵa uǵras paydalanıw máseleleri, topıraqtıń ónimdarlıǵın arttırıw – topıraqtıń quramın jaqsılaw ushın tógin beriw usılları, organikalıq hám mineral tóginlerden nátiyjeli paydalanıw boyınsha másláhátler berildi.
Seminardıń ámeliy bólimi dawamında fermerler hám qánigeler óz tájiriybeleri menen ortaqlasıp, baǵshılıqtı rawajlandırıw baǵdarında pikir alıstı.
Bul ilaj baǵshılıq penen shuǵıllanıp atırǵan fermerler ushın áhmiyetli tájiriybe maydanı bolıp, zamanagóy agrotexnologiyalardı ámeliyatqa engiziwde áhmiyetli qádem bolıp esaplanadı.
Ilajda qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.