Ájiniyaz atındaǵı Nókis mámleketlik pedagogikalıq institutında Rossiya Federaciyasınıń Moskva qalası «Ladomir» ilimiy-baspaxana orayında rus tilinde basıp shıǵarılǵan «Antologiya karakalpakskoy poezii» («Qaraqalpaq poeziyasınıń antologiyası») toplamınıń birinshi tomınıń tanıstırıw keshesi bolıp ótti.

Ilajǵa Qaraqalpaqstan Jazıwshılar awqamınıń baslıǵı, Ózbekstan xalıq jazıwshısı, Qaraqalpaqstan xalıq shayırı Keńesbay Karimov, instituttıń túrkiy tiller fakulteti professor-oqıtıwshıları hám ádebiyatqa ayrıqsha ıqlas qoyǵan student-jaslar qatnastı.
Keshede instituttıń jaslar máseleleri, ruwxıylıq hám aǵartıwshılıq isleri boyınsha birinshi prorektorı wazıypasın waqıtsha atqarıwshı Qarjawbay Reymov sózge shıǵıp, sońǵı jıllarda Rossiya hám Ózbekstan arasında sawda-ekonomikalıq tarawlardaǵı birge islesiwler menen bir qatarda mádeniy, ádebiy hám ilimiy baǵdardaǵı baylanıslardıń da rawajlanıp atırǵanlıǵı, dóretiwshi tulǵalar, belgili jazıwshı hám shayırlarımızdıń shıǵarmaların rus hám basqa da tillerge awdarıw arqalı dúnyaǵa keńnen tanıtıw boyınsha ámelge asırılıp atırǵan jumıslardıń áhmiyeti haqqında aytıp ótti.
Bunnan soń Qaraqalpaqstan Jazıwshılar awqamınıń baslıǵı Keńesbay Kárimov «Antologiya karakalpakskoy poezii» toplamınıń birinshi tomın tanıstırıp, onda qaraqalpaq xalıq dástanları «Qırıq qız», «Qoblan», «Sháryar» hám xalıq qosıqları, sonıń ishinde, balalar folklorı úlgileriniń rus tiline awdarmaları orın alǵanlıǵın atap ótti.

Sonı aytıp ótiw kerek, bul toplamdı baspaǵa tayarlawda rossiyalı belgili shayır hám dilmash, ádebiyat tariyxshısı Mixail Sinelnikov, Ózbekstannıń Rossiyadaǵı elshixanası, Ózbekstan hám Qaraqalpaqstan Jazıwshılar awqamları, Rossiyadaǵı qaraqalpaq diasporasınıń belsendi aǵzaları qatnasıp, onı kitap etip basıp shıǵarıwǵa shıǵısı ózbekstanlı isbilermen Alisher Usmanovtıń «Kórkem óner, ilim hám sport» qayırqomlıq qorı qarjılay járdem berdi.
Dástanlar hám xalıq qosıqların rus tiline awdarıwda belgili dilmashlar Arseniy Tarkovskiy, Sergey Severcev, Naum Grebnev hám Saǵınbay Ibragimovlardıń xızmetlerin ayrıqsha atap ótiw orınlı.
Qaraqalpaqstan Jazıwshılar awqamınıń baslıǵı Keńesbay Karimov óz sózinde toplamnıń ekinshi tomı da baspaǵa tayarlanıp atırǵanın, onda qaraqalpaq ádebiyatınıń XVIII-XIX ásirlerden baslap búgingi kúnge shekemgi dóretiwshileriniń shıǵarmaları orın alǵanlıǵın málimledi.
Sonday-aq, keshede instituttıń bir qatar professor-oqıtıwshıları da shıǵıp sóylep, qaraqalpaq ádebiyatın dúnya xalıqlarına tanıstırıw hám keleshek áwladlarǵa jetkerip beriw, xalıqlarımız arasında mádeniy-ádebiy baylanıslardı bekkemlewge xızmet etip atırǵan barlıq pidayı insanlarǵa minnetdarshılıq bildirdi.
Ilajda Qaraqalpaqstan Jazıwshılar awqamınıń baslıǵı K.Karimov «Antologiya karakalpakskoy poezii» toplamınıń birinshi tomın, sonday-aq, jaqında baspadan shıǵarılǵan «Baburnama» kitabı hám «Ótken kúnler» romanınıń qaraqalpaq tilindegi awdarmaların instituttıń málimleme-resurs orayına sawǵa etti.

Qaraqalpaqstan xabar agentligi