Sońǵı jılları elimizde Prezidentimiz basshılıǵında bilimlendiriw tarawına qaratılıp atırǵan itibar nátiyjesinde, Qaraqalpaqstanda xalıqaralıq Kembridj mektepleri shólkemlestirildi hám olarda respublikamız balaları zaman talabına say tálim-tárbiya almaqta.

Usı mekteplerdiń búgingi turmısı menen tanısıw maqsetinde, 29-yanvar kúni Kembridj bilimlendiriw baǵdarlaması boyınsha Britaniya mámleketindegi wákilleri, sonıń ishinde Kembridj xalıqaralıq shólkem eksperti Stiv King xızmet saparı menen Qaraqalpaqstanǵa keldi hám
Qaraqalpaqstan Respublikası Mektepke shekemgi hám mektep bilimlendiriwi ministri G.Kojabaeva menen birgelikte Nókis qalasında jaylasqan bir qatar mekteplerde boldı. Britaniyalı ekspertler eń dáslep jeke tártiptegi isbilermen M.Shımbergenov tárepinen shólkemlestirilgen «Kardar asademy school» mámleketlik emes jeke menshik mektepke barıp, ol jerde oqıwshılar ushın jaratılǵan qolaylıqlar menen jaqınnan tanısıp, xalıqaralıq shólkem eksperti Stiv King oqıwshılar menen inglis tilinde erkin sáwbetlesti hám ǵalaba xabar quralları xızmetkerleri tárepinen berilgen sorawlarǵa juwap berdi.
-Mektebimiz 2024-jılı 4-sentyabrden baslap xalıqaralıq Kembridj mektebi bolıp shólkemlestirildi,-deydi «Kardar asademy school» mámleketlik emes jeke menshik mektebiniń shólkemlestiriwshisi Murat Shımbergenov.-Búgingi kúni bul bilim dárgayında 1 mektepke tayarlaw, 16 baslawısh, 8 joqarı klassta jámi 400 oqıwshı tálim alıp, olarǵa 42 pedagog kadrlar bilim bermekte. Oqıwshılarımız sabaqtan tısqarı qosımsha, ayaq oyın, shaxmat, gimnastika, mental arifmetika, informatika, qıtay tili boyınsha dógereklerge qatnaspaqta.
Bunnan soń xalıqaralıq shólkem eksperti Stiv King paytaxtımızdaǵı 46-sanlı ayırım pánler tereńlestirilip oqıtılatuǵın klassları bolǵan ulıwma bilim beriw mektebindegi ashılǵan Kembridj klasslarına barıp, oqıwshılar ushın jaratılǵan qolaylıqlar menen jaqınnan tanıstı hám olar menen inglis tilinde sáwbetlesti. Sáwbetlesiw barısında, Stiv King oqıwshılar arasınan inglis tilinde emin-erkin sóylegen 2 oqıwshıǵa planshet sawǵa etti.
Maǵlıwmat ushın aytatuǵın bolsaq, Ózbekstan Respublikası Prezidentiniń arnawlı Pármanı, Qaraqalpaqstan Respublikası Joqarǵı Keńesiniń qollap-quwatlawı hám Ózbekstan Respublikası Mektepke shekemgi hám mektep bilimlendiriwi ministrliginiń arnawlı buyrıǵı tiykarında, mámleketimizde birinshi márte Nókis qalasında 46-sanlı ayırım pánler tereńlestirilip oqıtılatuǵın klassları bolǵan ulıwma bilim beriw mektebinde Kembridj klası shólkemlestirilgen edi hám házirgi waqıtta eki Kembridj klasında 40 oqıwshı oqıp bilim almaqta.
Sonday-aq, ilaj qatnasıwshıları Nókis qalasındaǵı Prezident mektebinde de barıp, xalıqaralıq shólkem eksperti Stiv King mektepte jaratılǵan qolaylıqlar hám mektep muǵallimleriniń oqıwshılarǵa sabaq ótiw usılları menen tanısıp, óziniń usınısların bildirdi.
Ilaj dawamında ǵalaba xabar qurallarınıń wákilleri mektepte qábiletli oqıwshılar ushın jaratılǵan sharayatlar, muǵallimlerdiń interaktiv usılda zamanagóy metodikalardan paydalanǵan halda sabaq ótiw barısı menen tanıstı.
Házirgi waqıtta Prezident mektebinde respublikamızdıń barlıq aymaqlarınan kelgen 5-11-klass oqıwshıları oqıydı.
-Oqıwshılar oqıw dáwirinde arnawlı jataqxana, 5 mezgil ıssı awqat, sabaqlıqlar hám 11 túrli kiyim-kenshekler menen biypul támiyinlengen,-deydi ministrliktiń baspasóz xatkeri Periyzat Urazalieva.-Mektepte oqıw STEM baǵdarında Kembridj oqıw hám jergilikli oqıw baǵdarlaması tiykarında qaraqalpaq hám inglis tillerinde alıp barıladı.
2020-jıl 30-dekabrde Prezident mektepleri Cambridge Assessment International Education akkreditaciyasınan tabıslı ótip Nókis qalasındaǵı Prezident mektebi UZ-403-sanlı Kembridj mektebi statusına iye boldı. Bul oqıwshılarǵa AS-level, A-level imtixanların mekteptiń ózinde tapsırıp, STEM pánleri boyınsha xalıqaralıq sertifikatlarǵa iye bolıw hám dúnyanıń abıraylı joqarı oqıw orınlarınıń grantın jeńip alıwǵa múmkinshilik jarattı.

Nókis qalasında jaylasqan xalıqaralıq Kembridj mektepleriniń turmısı menen tanısqan xalıqaralıq ekspert Stiv King sol kúni Tashkent qalasına jónep ketti.

Adilbay Orazov,
Qaraqalpaqstan xabar agentligi sholıwshısı