Niderlandiyanıń Veyk-an-Zee qalasında ótkerilip atırǵan shaxmat boyınsha «Tata Steel Chess-2025» qızǵın dawam etpekte.

Keshe ótkerilgen 10-turda «Masters» toparında jetekshilerdiń biri bolıp kiyatırǵan Nodirbek Abdusattorov serbiyalı Aleksey Sarana menen ushırasıp, onı jeńip shıǵıwǵa miyasar boldı. Bul jeńisten soń Abdusattorov óziniń upaylar sanın 7 ge jetkerip, ekinshi orındı iyelep tur.
Al, turnirdiń házirgi waqıttaǵı kárwanbasısı hindstanlı Gukesh Dommaradju niderlandiyalı Maks Varmerdamdı jeńip, óziniń upaylar sanın 7,5 ge jetkerdi.
Jáne bir hind grossmeysteri Rameshbabu Pragnanandha da bul turda sloveniyalı Vladimir Fedoseevti jeńip, 6,5 upay menen úshinshi orındı iyelep tur.
«Chellenjer» toparında qatnasıp atırǵan Nodirbek Yakubboev bolsa, niderlandiyalı Benjamin Bok penen teńbe-teń oynadı hám 5 upay menen turnir kestesinde toǵızınshı orındı iyelep kelmekte.

Adilbay Orazov,
Qaraqalpaqstan xabar agentligi sholıwshısı