Aldın xabar berilgenindey, Ózbekstan Respublikası Prezidentiniń 2024-jıl 30-dekabrdegi “Awıl xojalıǵı maydanlarındaǵı qosımsha múmkinshiliklerden paydalanǵan halda ónim jetistiriwdi kóbeytiwge baylanıslı ilajlar haqqında»ǵı qararı qabıl etildi.
Usı qararǵa muwapıq atız shetlerinde hám xalıqqa tiyisli qıytaq jerlerde, xojalıqlardıń hám kóp qabatlı jaylardıń aldı, máhálleniń ishki kóshelerinde awıl xojalıǵı ónimlerin jetistiriw sistemasın jetilistiriw boyınsha jańa tártip-qaǵıydalar engizilmekte.
Atap aytqanda, awıl xojalıǵı ónimlerin jetistiriwdi shólkemlestiriw boyınsha Ósimlikler karantini hám onı qorǵaw agentligine atız shetlerinde hám qıytaq jerlerde, xojalıqlarda hám kóp qabatlı jaylardıń aldında, máhálleniń ishki kóshelerinde ónim jetistiriw, awıl xojalıǵı subyektlerine tuqım hám nállerdi jetkeriw, jetistirilgen ónimlerdi eksportqa baǵdarlawdı shólkemlestiriw wazıypası júklenedi.
Agentlik jıl dawamında ónimi joqarı bolǵan eginlerdi egiw hám olardı eksportqa shıǵarıw ushın miywe-palız ónimlerin eksport etiwshi isbilermenlerdiń talapların úyrenedi.
Atız shetlerinen nátiyjeli paydalanǵan awıl xojalıǵı ónimlerin jetistiriwshilerdi qollap-quwatlaw maqsetinde ishki fitosanitariya sertifikatı bir jıl dawamında biypul beriledi.
Atız shetlerine egilgen, “in-vitro” usılında jaratılǵan sabıw ushın arnalǵan miywe nállerin satıp alıw qárejetleriniń 50 procenti muǵdarında, biraq hár bir sabıw ushın arnalǵan miywe náline 25 mıń sumnan aspaǵan halda Agrosanaattı rawajlandırıw hám qollap-quwatlaw mámleketlik maqsetli qorınan belgilengen tártipte subsidiya ajıratıladı.
Qarardıń maqseti hám áhmiyetin atap ótetuǵın bolsaq, onda awıl xojalıǵına arnalǵan jer uchastkalarınıń, atızlardıń shetleri, kanallar, suwǵarıw hám kollektor-drenaj tarmaqlarınıń átirapındaǵı maydanlarda (jaǵalıq boyındaǵı aymaqlar oǵan kirmeydi), xalıqqa tiyisli qıytaq jer, xojalıqlar hám kóp qabatlı jaylardıń aldı, máhálleniń ishki kóshelerinde awıl xojalıǵı ónimleri jetistiriliwin nátiyjeli shólkemlestiriw hám kóbeytiw arqalı mámlekettiń eksport kórsetkishlerin arttırıw názerde tutılǵan.
Qarardıń taǵı bir zárúr tárepi bar. Usı jumıslarǵa nemquraydılıq penen qaraǵan isbilermenlik subyektlerine eskertiw xatı beriledi. Aldaǵı waqıtları usı huqıqıy hújjetke tiykarlanıp awıl xojalıǵı ónimlerin jetistiriwshilerge olardıń barlıq awıl xojalıǵına arnalǵan jerleri ushın jer salıǵı stavkası úsh ese muǵdarında esaplanıwı hám awıl xojalıǵın mámleket tárepinen qollap-quwatlaw fondınan belgilengen tártipte ajratılatuǵın kredit resursları esabınan finanslıq támiyinlew toqtatılıwı hám atız shetlerin ekilemshi kireyge alǵan kireyshilerge Agrosanoat kompleksi ústinen baqlaw inspekciyası tárepinen bazalıq esaplaw muǵdarınıń on esesine shekemgi muǵdarda járiyma qollanılıwı haqqındaǵı maǵlıwmatlar da keltirip ótilgen. Bul nárse óz gezeginde jer iyeleriniń juwapkershiligin kúsheytiw esabınan dáramatlarınıń artıwına xızmet etedi.
D.Sársenbaev,
“Ózagroinspekciya”nıń Qaraqalpaqstan Respublikası basqarması
Awıl xojalıǵına arnalǵan jerlerden paydalanıwdı
baqlaw bóliminiń bas qánigesi.
Qaraqalpaqstan xabar agentligi.