Mámleketimiz basshısı 2025-jıl 28-yanvarda «Ózbekstan Respublikasınıń ayırım nızam hújjetlerine ózgeris hám qosımshalar kirgiziw haqqında»ǵı nızamǵa qol qoydı.

Nızam menen ayırım nızam hújjetlerine ózgeris hám qosımshalar kirgizildi. Oǵan bola, tergew sudyaları tárepinen jınayat isleri boyınsha sudqa shekem jumıs alıp barıw basqıshında processual qararlarǵa sankciya beriw hám hákimshilik huqıqbuzarlıqlar haqqındaǵı islerdi kórip shıǵıw máselelerin nızamshılıqta belgilew maqsetinde tergew sudyalarınıń wákilliklerine kirgizilgen islerdi kórip shıǵıw tiykarları hám tártibin názerde tutıwshı ózgeris hám qosımshalar kirgizildi.
Jınayat-processual kodeksine kirgizilgen ózgeris hám qosımshalarǵa bola, tergew sudyasınıń wákillikleri belgilendi. Tergew sudyası jeke is tutıp, kodekste názerde tutılǵan tártipte sudqa shekem jumıs alıp barıw basqıshında shaxstıń huqıqları, erkinlikleri hám nızamlı máplerine ámel etiliwi ústinen sud qadaǵalawın ámelge asıradı.
Sonday-aq, tintiw ótkeriw haqqında ótinish xatın qozǵatıw hám onı kórip shıǵıw tiykarları belgilendi. Onda, tintiw ótkeriw ushın tiykarlar bolǵan jaǵdayda prokuror, tergewshi yaki sorastırıwshı tintiw ótkeriw haqqında ótinish xatın qozǵatıw haqqında onı ótkeriw ushın tiykarlardı bildirgen halda qarar shıǵaradı.
Telefonlar hám basqa telekommunikaciya qurılmaları arqalı alıp barılatuǵın sóylesiwlerdi tıńlap turıwdı, olar arqalı uzatılatuǵın málimlemeni alıwdı ámelge asırıw haqqındaǵı ótinish xatın kórip shıǵıw tiykarları belgilendi.
Bunnan tısqarı, múlkti xatlaw haqqındaǵı ótinish xatın kórip shıǵıw tártibi belgilendi. Onda, múlkti xatlaw haqqındaǵı ótinish xatı sorastırıw yaki dáslepki tergew júrgizilip atırǵan orındaǵı jınayat isleri boyınsha rayon (qala) sudınıń tergew sudyası tárepinen jeke tártipte kórip shıǵılad.

ÓzA