«Farmacevtika tarmaǵın jedel rawajlandırıwǵa baylanıslı qosımsha ilajlar haqqında»ǵı Prezident pármanı qabıl etildi.
Pármanǵa bola, Farmacevtika tarmaǵın rawajlandırıw agentligine tómendegi qosımsha wazıypalar júklendi:
– biologiyalıq belsendi qosımshalar hám kosmetika ónimleri sanaatın rawajlandırıw, sonıń ishinde, bazar konyyunkturasın úyreniw, tallaw hám óndiristi lokalizaciyalaw, bul baǵdardaǵı taraw kárxanalarına aldıńǵı sırt el ámeliyatı hám standartların qollanıwǵa járdemlesiw;
– jergilikli hákimlikler menen birgelikte aymaqlıq farmacevtika kárxanalarınıń investiciyalıq joybarların monitoring etiw hám esabın alıp barıw;
– farmacevtika tarawın sanlastırıw hám málimleme baǵdarlamaların engiziw.
2025-jıldıń aqırına shekem Farmacevtika ónimleri qáwipsizligi orayınıń laboratoriyası Jáhán densawlıqtı saqlaw shólkeminiń dáslepki kvalifikaciya (prequalification) tártibinen ótkeriledi.
2025-jıl 1-aprelden:
– sheklengen sawda ústemeleri tek ǵana recept penen beriletuǵın dári quralları kategoriyasına qollanıladı;
– bir islep shıǵarıwshı tárepinen hár qıylı sawda atları astında quramı birdey bolǵan dári quralların islep shıǵarıwda usı dári qurallarınıń barlıǵına eń tómen referent baha qollanadı;
– «Farmacevtika ónimleri qáwipsizligi orayı» tárepinen sırt el valyutasında dizimge alınǵan referent bahalar belgilengen jaǵdaylarda avtomat túrde (isbilermenniń múrájatısız) qayta kórip shıǵıladı.
Pármanǵa muwapıq, farmacevtika ónimleri eksportınıń kólemin arttırıw maqsetinde:
– jergilikli óndiris kárxanalarınıń dári qurallarınan birewin AQShtıń “Food and Drug Administration” (FDA) yamasa Evropa Awqamınıń “European Medicines Agency” (EMA) shólkemlerinde dizimnen ótkeriwge baylanıslı qárejetleriniń 100 procenti olar dizimnen ótkerilgeni haqqında tastıyıqlawshı hújjetler inam etilgennen soń qaplap beriledi;
– jergilikli óndiris kárxanalarınıń farmacevtika ónimlerin sırt ellerde dizimnen ótkeriw menen baylanıslı qárejetleriniń 50 procenti olar dizimnen ótkerilgeni haqqında tastıyıqlawshı hújjetler usınılǵannan soń qaplap beriledi.
Tómendegiler shólkemlestiriledi:
– Farmacevtika tarawınıń biofarmacevtika, kletka texnologiyaları, onkologiya sıyaqlı baǵdarlarındaǵı startap joybarlardı qarjılandıratuǵın venchur qorı;
– Farmacevtika tarmaǵınıń perspektivalı joybarları investiciya qorı.
2025-jıl 1-iyulge shekem 5 úlgili dárilik ósimlikler plantaciyaları shólkemlestiriledi hám 2026-jıldıń aqırına shekem bul plantaciyalarda jetistirilgen dárilik ósimliklerdi qayta islew joybarları iske qosıladı.
Farmacevtika kárxanalarınıń jumısına aldıńǵı standartlardı qollanıw boyınsha marketing hám konsalting xızmetlerin kórsetiwge qánigelesken “Pharm Service” mámleketlik mákemesi shólkemlestiriledi.

ÓzA