Prezidentimizdiń baslaması menen Ministrler Kabinetiniń 2022-jıl 25-avgusttaǵı «Qaraqalpaqstan Respublikası hám Xorezm wálayatında jaylasqan ulıwma orta bilimlendiriw mákemelerinde salamat awqatlandırıw sistemasın jáne de jetilistiriw ilajları haqqında»ǵı 427-sanlı qararına tiykarlanıp, Qaraqalpaqstan Respublikası hám Xorezm wálayatında jaylasqan ulıwma orta bilimlendiriw mekteplerinde 1-4-klass oqıwshıların biypul awqatlandırıw boyınsha sistema engizilgen edi.
Beruniy rayonı Mektepke shekemgi hám mektep bilimlendiriwi bólimine qarası 71 ulıwma bilimlendiriw mektebinde 2 keytering shólkemi tárepinen 1-klasstan 4-klassqa shekemgi oqıwshılarǵa keytering usılında sapalı awqatlar jetkerilip berilmekte.
Rayonlıq Sanitariya-epidemiyalogiyalıq tınıshlıq hám jámiyet salamatlıǵı bólimi tárepinen Azıq-awqat ónimleri mektep komissiya aǵzaları tárepinen sertifikatları, jaramlılıq múddetleri, taǵamnamaǵa sáykesligi hám sapasına qarap qabıl etiliwi boyınsha hár ayda qadaǵalaw tekseriwleri ótkerilip kelinbekte.
– Jaratılǵan bunday múmkinshiliklerden xalıq quwanıshlı hám razı, – deydi Beruniy rayonı hákimligi málimleme xızmeti bóliminiń baslıǵı Aynura Urazova.
Qaraqalpaqstan xabar agentligi