Еkonomika hám qarjı ministrliginde «Jasıl» innovaciyalıq texnologiyalardan paydalanǵan halda energiya nátiyjeliligin arttırıw hám turaqlı ıssılıq támiynatın támiyinlew máseleleri» temasında dógerek sáwbeti ótkerildi.
Ózbekstan Respublikası bas ministriniń orınbasarı – ekonomika hám qarjı ministri Jamshid Qwchqarovtıń basshılıǵında ótkerilgen ilaj xalıqaralıq qarjı institutları hám shólkemleri menen birgelikte shólkemlestirildi.
Bul ilajda ámeldegi imaratlardıń energiya nátiyjeliligin arttırıw, oraylasqan ıssılıq támiynatın reformalaw hám turaqlı rawajlandırıwǵa qaratılǵan Prezident qararınıń joybarı boyınsha ekspert pikirleri hám usınısları tıńlandı.
Dógerek sáwbetinde xalıqaralıq qarjı institutları hám shólkemleriniń wákilleri menen birge, Qurılıs hám turaq jay kommunal xojalıǵı, Еnergetika, Densawlıqtı saqlaw, Mektepke shekemgi hám mektep bilimlendiriwi ministrlikleriniń juwapkerleri qatnastı.
Ilaj dawamında ámeldegi imaratlardıń energiya nátiyjeliligin arttırıw, qayta tiklenetuǵın energiya dereklerinen paydalanıw, energiya shıǵının azaytıw hám oraylasqan ıssılıq támiynatı sistemasın talqılaw dodalandı. Sonday-aq, tarawdaǵı bar mashqalalardı saplastırıw ushın zamanagóy texnologiyalıq sheshimlerdi engiziw zárúrligi atap ótildi.
Qarar joybarında energiya únemleytuǵın texnologiyalardı keńnen engiziw, imaratlardıń energiya nátiyjeliligin arttırıw, qayta tiklenetuǵın energiya dereklerin integraciyalaw, energiya shıǵının minimallastırıw hám turaqlı ıssılıq támiynatı sistemasın rawajlandırıw ilajları belgilengen.
Qarardı islep shıǵıw procesinde Jáhán banki, Evropa tikleniw hám rawajlanıw banki, Aziya rawajlanıw banki hám Xalıqaralıq energetika agentilgi sıyaqlı shólkemlerdiń usınısları hám tájiriybesi esapqa alındı.
Dógerek sáwbetinde Jáhán banki, Aziya rawajlanıw bankiniń ekspertleri óz prezentaciyaları menen qatnasıp, energiya nátiyjeliligi hám ıssılıq támiynatı sistemasın jetilistiriw strategiyaların usındı. Sonday-aq, BMShRB, Xalıqaralıq qarjı korporaciyası, GIZ hám basqa da shólkemlerdiń wákilleri tárepinen Ózbekstannıń ıssılıq támiynatı tarawın modernizaciyalawda «jasıl» texnologiyalardan paydalanıw boyınsha usınıslar bildirildi.
N.Ziyodullaeva,
ÓzA