Qaraqalpaqstan Respublikası Ministrler Keńesi tárepinen usı jıldıń 8-yanvarında tastıyıqlanǵan Qaraqalpaqstan Respublikası Suw xojalıǵı ministrligi administraciyasınıń fizikalıq hám yuridikalıq táreplerdi hám olardıń wákillerin kóshpeli qabıllaw rejesine muwapıq, Qanlıkól hám Bozataw rayonlarında kóshpeli qabıllaw ótkerildi.
Rayonlardaǵı “Suw jetkeriw xızmeti” mámleketlik shólkemleriniń hákimshilik imaratlarında ótkerilgen kóshpeli qabıllawlarda fermerler, qıytaq jer iyeleri hám máhálle belsendileri qatnasıp, mashqalalı máseleleri tuwralı múrájatlerin bildirdi.
Eń kóp múrájat fermer hám klasterlerdiń esabındaǵı ishki salmalardı qazıp-tazalaw ushın ekskavator ajıratıw máselesi boldı. Qıytaq jerlerge suw jetkeriwde ushırasıp atırǵan mashqalalar, awıl puqaralar jıyınları aymaqlarına qosımsha nasos agregatların ornatıw máselesi boyınsha da bir neshe puqaralardan múrájat tústi.
Qaraqalpaqstan Respublikası Suw xojalıǵı ministri B.Juzbaev múrájatlerde kórsetilgen máselelerdiń orınlanıwın qadaǵalawǵa alatuǵınlıǵın atap ótip, suwǵarıw tarmaqların tazalawǵa texnika ajıratıw hám basqa usınday máseleler boyınsha suw xojalıǵı mákemeleriniń basshılarına tapsırmalar berdi.
Bozataw rayonında ótkerilgen kóshpeli qabıllawda rayon hákiminiń orınbasarı hám Qaraqalpaqstan nasos stanciyaları hám energetika basqarması, “Qattıaǵar-Bozataw” irrigaciya sisteması basqarmasınıń juwapker basshıları da qatnastı.
Ilaj dawamında Suw xojalıǵı ministriniń birinshi orınbasarı A.Urazimbetov hár bir múrájattı ayrıqsha qarap, hár tárepleme túsinikler berdi hám olardıń unamlı sheshiliwi boyınsha ilajda qatnasıp atırǵan suw xojalıǵınıń aymaqlardaǵı basshılarına kórsetpeler berildi.
Kóshpeli qabıllawlarda málim etilgen házirgi kúndegi shor juwıw ilajları, qosımsha suw beriw menen baylanıslı máselelerdiń kópshiligi óz ornında sheshilip, múrájatlerdiń unamlı sheshiliwine erisildi. Qosımsha úyreniw talap etiletuǵın múrájatler qadaǵalawǵa alındı.
Bul baǵdardaǵı ilajlar orınlarda dawam etpekte.
Qaraqalpaqstan xabar agentligi