Tashkent mámleketlik yuridika universitetinde belgili mámleketlik hám jámiyetlik ǵayratker, Ózbekstan Respublikasına xızmet kórsetken yurist Ubaydulla Mingboev tuwılǵanınıń 90 jıllıǵı múnásibeti menen aǵartıwshılıq ilaj bolıp ótti.

U.Mingboev elimizdiń sud-huqıq uyımlarında derlik 60 jıldan berli jemisli miynet etip kelmekte. Joqarı sudtıń ózinde 20 jılǵa shamalas jumıs islegen. Sonıń ishinde, 12 jıl dawamın(1991-2002-jıllar)ı Joqarı sudtıń baslıǵı, 2018-2020-jılları Sudyalar joqarǵı keńesiniń baslıǵı lawazımında xızmet etken.
2009-jıldan berli Ózbekstan sud sisteması veteranların sociallıq qollap-quwatlaw jámiyetlik orayınıń baslıǵı sıpatında jumıs alıp barmaqta.
Ol usı kúnge shekem «Ózbekstan Respublikasına xızmet kórsetken yurist» húrmetli ataǵı, «Fidokorona xizmatlari uchun» ordeni, «Jasorat» medalı menen sıylıqlanǵan edi.
Búgin bolsa Ózbekstan Respublikası Prezidentiniń pármanı menen Ubaydulla Mingboevqa «Ózbekstan Respublikasına xızmet kórsetken jaslar ustazı» ataǵı berildi.
Prezident keńesgóyi Ǵofurjon Mirzaev mámleketimiz basshısınıń qutlıqlawın hám pármandı oqıp esittirdi. Bul sıylıq yubilyarǵa jámiyette nızamshılıqtı támiyinlew, ádillikti ornatıw arqalı insannıń qádir-qımbatın ulıǵlaw, puqaralardıń huqıqları menen máplerin qorǵawǵa qosqan múnásip úlesi, joqarı qánigeli kadrlardı tayarlaw, jas áwladtı Watansúyiwshilik, ulıwma insanıylıq qádiriyatlarǵa húrmet ruwxında tárbiyalaw baǵdarındaǵı jemisli miyneti, jámiyetlik-siyasiy turmısqa belsene qatnasıqanı ushın berilgenin atap ótti.
U.Mingboev ǵárezsiz Ózbekstan Joqarı sudınıń birinshi baslıǵı bolǵanı, birinshi Konstituciyamızdıń joybarın dúziwge qatnasqanlıǵın aytıp ótiw kerek. Respublikamızda birinshi márte «Sudlar haqqında»ǵı nızamdı tayarlawda jumısshı toparǵa basshılıq etken. Ótken ásirdiń 30-35-jıllarında repressiya etilgenlerdiń, 83-86-jıllarında «Ózbekler isi» dep nahaq qamaqta jatqanlardıń kópshiligine ádil sud qararların shıǵarǵan.
Shıǵıp sóylegenler yubilyardıń jámiyet hám mámleket aldındaǵı usı sıyaqlı xızmetlerin ayrıqsha atap ótti.

Umidjon Qurbanov, Nosir Haydarov (foto), ÓzA