Oliy Majlis Nızamshılıq palatasınıń deputatı Ruslan Djumamuratov Nókis qalasınıń orayınan 100 kilometrlik qashıqlıqta jaylasqan Qarataw mákan puqaralar jıyınında jasaytuǵın xalıq hám «máhálle jetiligi» menen ushırastı.

Ushırasıwlar dawamında “Ózbekstan – 2030” strategiyasınıń mazmun-mánisi, mámleketimizde ámelge asırılıp atırǵan keń kólemli reformalar, qabıl etilgen nızamlardıń xalıqtıń turmısında tutqan ornı hám áhmiyeti haqqında keń túrde maǵlıwmatlar berildi.
– Máhálle «jetiligi» – mákan puqaralar jıyını baslıǵı, xákim járdemshisi, jaslar jetekshisi, hayal-qızlar belsendisi, profilaktika inspektorı, sociallıq xızmetker hám salıq inspektorınıń jumıs ѳnimdarlıǵı olardıń hár biriniń ѳz jumıslarına bolǵan juwapkershiligine tikkeley baylanıslı,-deydi Qarataw MPJ nıń hayal-qızlar belsendisi Dilbar Artıqbaeva. – Sáwbetlesiw dawamında usı baǵdardaǵı jumıslarımızdıń nátiyjeliligin arttırıwǵa qaratılǵan bir qatar maǵlıwmatlarǵa iye boldıq.
Sóylesiwler waqtında puqaralar tárepinen bir qatar múrájatler bildirildi.
Atap aytqanda, aymaqta ishimlik suwı tarmaǵı 1989-jılı shoyın qubırlar arqalı tartılǵan bolıp, búgingi kúnge kelip olardıń tozǵanlıǵı sebepli xalıqqa ishimlik suwın jetkerip beriwde bir qatar mashqalalar payda bolmaqta.
Bul másele boyınsha ishimlik suwı tarmaǵına jańa qubırlar ornatıw boyınsha deputat tárepinen investiciya baǵdarlamasına kirgiziliwi belgilendi hám basqa da múrájátler deputat tárepinen qadaǵalawǵa alındı.
Deputat jetilik penen ushırasıwdan soń, aymaqtaǵı 44-sanlı balalar baqshasına da barıp, ol jerde jaratılǵan sharayatlar menen tanısıp, pikir-usınısları tıńlandı.
Bul baǵdardaǵı ushırasıwlar orınlarda dawam etpekte.

Qaraqalpaqstan xabar agentligi.