Házirgi kúnde Ózbekstan sırtqı ekonomikalıq baylanıslardı keńeytiw hám sırt eller menen birge islesiwdi bekkemlew jolında úzliksiz siyasat alıp barmaqta.

Ózbekstan Respublikası awıl xojalıǵı ministri Ibrohim Abdurahmonov Túrkiya awıl hám toǵay xojalıǵı ministriniń orınbasarı Abubekir Gizligidir basshılıǵındaǵı delegaciya menen ushırastı. Onda eki mámleket arasındaǵı agrar tarawdaǵı birge islesiwdiń búgingi jaǵdayı hám perspektivalı joybarlar dodalandı.
Haqıyqatında da keyingi jılları Ózbekstan hám Túrkiya arasındaǵı birge islesiw baylanısları jedel rawajlanbaqta. Ásirese, awıl xojalıǵındaǵı birge islesiw hár eki mámleket máplerine sáykes túrde rawajlanıp atırǵanı ayrıqsha itibarǵa ılayıq.
Ushırasıwda ministr Ibrohim Abduraxmonov agrar tarawda bar, biraq ele paydalanılmaǵan imkaniyatlardı iske qosıw arqalı jańa birge islesiw baǵdarların rawajlandırıw áhmiyetli ekenligin atap ótti.
Sonday-aq, Ózbekstanda sırt el investorları ushın jaratılǵan qolaylı sharayatlar hám awıl xojalıǵı ónimlerin qosımsha qun shınjırı arqalı eksport etiw imkaniyatları haqqında maǵlıwmat berdi, delinedi Awıl xojalıǵı ministrliginiń maǵlıwmatında.
Túrkiya awıl hám toǵay xojalıǵı ministriniń orınbasarı Abubekir Gizligidir bolsa óz gezeginde birge islesiwdi jáne de keńeytiw boyınsha bir qatar usınıslardı bildirdi. Sonıń ishinde, baǵshılıq, balıqshılıq, awıl xojalıǵı eginlerin qamsızlandırıw sistemasın engiziw hám zamanagóy azıq-awqat qáwipsizligi laboratoriyaların shólkemlestiriw máselelerinde birge islesiwdi jolǵa qoyıw usınıs etildi.
Sóylesiwler sońında tárepler házirgi birge islesiw baylanısların tereń tallap, keleshekte ámelge asırılatuǵın joybarlardı belgilew hám tiyisli paketin islep shıǵıw boyınsha kelisimge eristi.

M.HOJIAKBAROVA, ÓzA