Prezidentimiz Shavkat Mirziyoev ótkergen májiliste elektr energetikasın 2025-2035-jıllarda rawajlandırıw ilajları boyınsha áhmiyetli tapsırmalar berildi.

Usı tarpsırmalardıń orınlanıwın támiyinlew maqsetinde Bas prokurordıń orınbasarı Shoxrur Aminov tárepinen janılǵı-energiya resurslarınan paydalanıw ústinen mámleketlik qadaǵalawdı nátiyjeli shólkemlestiriw hám muwapıqlastırıw boyınsha Respublika shtabınıń keńeytilgen májilisi ótkerildi.
Májiliste janılǵı-energiya resursların talan-taraj etiw jaǵdaylarınıń aldın alıw hám energoresurslardı únemlew boyınsha ámelge asırılıp atırǵan jumıslardıń barısı sın kózqarasta dodalandı.
Juwapkerlerge mámleketimiz basshısı ótkergen májiliste 100 mıń obyekt, 150 mıń shańaraqta ulıwma 600 MVt quwatlılıqta quyash paneli ornatılıwı boyınsha berilgen tapsırmanıń orınlanıwın támiyinlew maqsetinde orınlarda jergilikli hákimlikler, bajıxana, «Ózenergoinspekciya», kommerciyalıq bankler, támiynat kárxanaları, hám basqa tiyisli uyımlardan ibarat jumısshı topar dúziw boyınsha kórsetpe berildi.
Sonıń menen birge, únemlewdiń qosımsha dereklerin anıqlaw, reaktiv batareya ornatıw boyınsha kótere tutınıwshıǵa kórsetpe beriw, eki basqıshlıǵa ótkeriw, standart emes gaz jandırǵıshlardı almastırıw boyınsha rayonlar kesiminde ayma-ay grafik islep shıǵıw, 400 iri tutınıwshıǵa energoaudit ótkeriw boyınsha tapsırmalar berilip, orınlanıwı Respublika shtabı tárepinen ayrıqsha qadaǵalawǵa alındı.
Bunnan tısqarı, berilgen tapsırmalardı belgilengen múddetlerge orınlaw, bar mashqalalardı jedellik penen sheshiw zárúr ekenligi atap ótildi, sonday-aq, jol qoyılǵan kemshilikler boyınsha juwapkerler sınǵa alınıp, eskertildi.

Norgul Abduraimova, ÓzA