Taqıyatas rayonında jaylasqan Qorǵanıw ministrligine qaraslı áskeriy bólimde kóshpeli qabıllaw hám bos jumıs orınları miynet yarmarkası shólkemlestirildi. Onda áskeriy xızmetkerler hám olardıń shańaraq aǵzalarınıń sociallıq máselelerine baylanıslı mashqalalarına sheshim tabıldı.
Ilajǵa Ózbekstan Respublikası Milliy gvardiyası hám Ayrıqsha jaǵdaylar ministrligi áskeriy xızmetkerleri hám olardıń shańaraq aǵzaları qatnastı.
Kóshpeli qabıllaw dawamında dáslep Nókis áskeriy prokurorı A.Matyakubov tárepinen ashıq sáwbetlesiw ótkerilip, áskerler hám olardıń shańaraq aǵzalarına jaratılǵan sharayatlar, múmkinshilikler hám jeńillikler haqqında maǵlıwmatlar berildi. Ótkerilip atırǵan ilajlardıń áhmiyeti atap ótildi.
Atap ótilgenindey, mámleketimiz basshısınıń baslaması menen mámleketimizde jaratılǵan “Xalıq penen qarım-qatnas” xalıqshıl sisteması sebepli, xalıq mámleketlik uyımlar ushın emes, al mámleketlik uyım xızmetkerleri xalıqqa xızmet etiwi kerek degen iygilikli principtiń ámelde qollanılıwı arqasında kóplegen jerleslerimizdi jıllar dawamında qıynap kelgen mashqalalar, sheshimi tabılmay atırǵan máseleler sheshilmekte.
Qabıllıwda áskeriy xızmetkerlerdiń shańaraq aǵzalarınıń jumısqa ornalasıwı hám perzentleriniń bilimlendiriw mákemelerine kiriwi, jeńilletilgen ipoteka krediti tiykarında ajıratılatuǵın turaq jaylardı satıp alıwı, salıq tólemlerin tólewdegi jeńillikler hám basqa da máseleler boyınsha jámi 35 múrájatı qabıl etildi. Sonnan 14 múrájat sol jerdiń ózinde qanaatlandırılǵan bolsa, 12 múrájat boyınsha huqıqıy túsinikler berildi, 9 múrájattıń orınlanıwı qadaǵalawǵa alınǵan halda tiyisli shólkemlerge jiberildi.
Miynet yarmarkasına rayonnıń bántlikke kómeklesiw hám kámbaǵallıqtı qısqartıw bólimi, medicina birlespesi, Xalıq banki, salıq bólimi, mektepke shekemgi hám mektep bilimlendiriwi bólimi hám taǵı basqa bir qatar shólkemlerdiń juwapkerleri qatnastı.

Á.Jiyemuratov,
Qaraqalpaqstan xabar agentligi.