Sońǵı jılları Prezidentimizdiń basshılıǵında elimizde sport tarawın rawajlandırıwǵa qaratılǵan ayrıqsha itibardıń nátiyjesinde, mámleketimiz sportshıları xalıqaralıq arenalarda Ózbekstan bayraǵın bálentlerde jelbiretpekte. Ásirese, boksshilerimizdiń Aziya, jáhán chempionatlarında, Olimpiada oyınlarında qolǵa kirgizip atırǵan tabısları xalqımızdı quwanıshqa bólemekte. Jasırarlıǵı joq, sońǵı waqıtları Ózbekstan saylandı komandasınıń boksshileri xalıqaralıq jarıslarda gegemonlıq etpekte, desek asıra aytqan bolmaymız.

Bul bolsa, Ózbekstannıń barlıq aymaqlarında bokstiń joqarı dárejede rawajlanǵanınan dárek berip, mámleket chempionatında jeńimpaz bolıwdıń ózi oǵada múshkil is ekenligin ańlatadı. Kópshilik sport jankúyerleriniń xabarı bolǵanınday, kóp jıllardan berli erler arasında eresek jastaǵı qaraqalpaqstanlı boksshiler Ózbekstan chempionı bola almay kiyatırǵan edi. 2025-jıldıń 28-yanvar kúni bul «qolaysız» dástúr óz juwmaǵına jetti.
Sebebi, Tashkent qalasında ótkerilgen boks boyınsha Ózbekstan chempionatınıń final bellesiwinde, -60kg salmaqta qatnasqan jerlesimiz Madiyar Daniyarov Tashkent wálayatı wákili Shahrux Abdimalikovtı 5:0 esabında jeńip, Ózbekstan chempionı ataǵına miyasar boldı.
– Qaraqalpaqstan boksi tariyxında bunnan 20 jıl burın, yaǵnıy 2005-jılı eń aqırǵı márte Álibek Krabaev eresekler arasında Ózbekstan chempionı bolǵan edi,-deydi belgili trener Ikram Shamuratov.-Bul álbette, barlıq boks jankúyerlerine quwanısh baǵıshlap, ósip kiyatırǵan jas boksshilerimizge motivaciya boldı. Aldaǵı waqıtları, jas boksshilerimiz arasınan da usınday chempionlar jetilisip shıǵatuǵınlıǵına bekkem isenemiz.
Sonday-aq, bul chempionatta hayal-qızlar arasında -60 kg salmaqta Rashida Tagirova hám -66 kg da Aysánem Sárwarovalar finalǵa shekem jetip kelip, gúmis medalın qolǵa kirgiziwge miyasar bolǵan bolsa, – 63 kg da Axmedova Mohira Axmedova menen + 81 kg da Zarafshan Xojambergenovalar qola medalın jeńip aldı.
Jeńimpaz sportshılardı bul jarısqa trenerlerden Sh. Aytbaev, R.Seytov, J.Nurımbetov, R.Ametov hám A.Matkarimovler tayarladı.

Adilbay Orazov,
Qaraqalpaqstan xabar agentligi sholıwshısı