ÓzLiDePtiń Oliy Majlis Nızamshılıq palatasındaǵı frakciyası aǵzaları aymaqlarǵa shıǵıp, xalıq penen sóylesiwler ótkeriw arqalı olardıń mashqala hám usınısların úyreniwdi dawam ettirmekte. Bul processte bildirilgen usınıslar boyınsha nátiyjeli deputatlıq qadaǵalawdı ornatıw, mashqalalardı mánzilli sheshiw máseleleri de keńnen dodalanbaqta.
Atap aytqanda, usınday baslamalar sheńberinde Oliy Majlis Nızamshılıq palatasınıń deputatı Gúljan Xalmuratova Xojeli rayonındaǵı “Tınıshlıq” máhállesinde bolıp, jergilikli xalıq penen ashıqtan-ashıq sóylesiw ótkerdi.
Ilajda elimizde keyingi jıllarda ámelge asırılıp atırǵan túpkilikli reformalar, nızamshılıqtaǵı jańalıqlar, qabıl etilip atırǵan nızamlar, qarar hám pármanlardıń mazmun-mánisi boyınsha tolıq maǵlıwmatlar berip ótildi.
Sonıń menen birge, deputat Gúljan Xalmuratova tárepinen xalıqtı qıynap kiyatırǵan mashqalalar hám sheshimin talap etip atırǵan máselelerdi sheshiw maqsetinde rayondaǵı 6-sanlı mektep imaratında kóshpeli qabıllaw ótkerildi.
Qabıllaw dawamında xalıq wákilleri tárepinen 15 ke shamalas múrájatler qabıl etildi. Puqaralardıń bántligi, transport hám jol qurılısı, isbilermenlikti qollap-quwatlaw, densawlıqtı saqlaw, jumıssızlıq, turaq jay máselesi, sociallıq taraw obyektlerin ońlaw hám qurıw sıyaqlı mashqalalardıń bar ekenligi anıqlandı.
Sáwbetlesiw waqtında kóterilgen ayırım máselelerge nızam sheńberinde usınıslar hám maǵlıwmatlar berilgen bolsa, ayırım sheshimin kútip turǵan múrájatler deputat tárepinen qadaǵalawǵa alındı hám unamlı saplastırıwǵa kelisip alındı.

Qaraqalpaqstan xabar agentligi