Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında bilimlendiriwdiń sapasın arttırıw, ilimiy hám ámeliy izertlewlerdi rawajlandırıw hám student-jaslar ushın jáne de qolaylı sharayat jaratıw baǵdarında ámelge asırılıp atırǵan jumıslar menen jaqınnan tanısıw maqsetinde Ózbekstan Respublikası Joqarı bilimlendiriw, ilim hám innovaciyalar ministri, Respublikalıq jumısshı topar basshısı Końıratbay Sharipov usı oqıw ornında boldı.

Ministr 6 qabatlı 400 orınǵa mólsherlengen, mámleketlik-jeke menshik sheriklik tiykarında qurılıp atırǵan studentler turaq jayın barıp kórdi. Bul zamanagóy joybarǵa iye jataqxananı 2 lift, ruwxıylıq, dem alıw hám gigiena xanaları, zárúr qolaylıqlarǵa iye asxana hám kompyuter xanalar menen támiynlew rejelestirilgen.
Filialda veterinariya xirurgiyalıq klinikası, balıqshılıq, ximiya, biologiya, zooinjeneriya sıyaqlı jámi 10 laboratoriya bolıp, studentlerdiń ilimiy hám ámeliy bilimler alıw imkaniyatların arttırıwǵa zárúr sharayatlar jaratılǵan.
Ótken jılı Germaniyanıń GIZ shólkeminiń qarjıları esabınan ximiya, biologiya hám qánigelikke baǵdarlanǵan laboratoriyalar tolıq úskenelengen. Sonday-aq, Islam rawajlanıw banki qarjıları esabınan «Biologiya» oqıw-laboratoriyası ushın mólsherlengen 29 atamadaǵı úskene alıp kelinip, ornatılǵan.
Respublikalıq jumısshı topar 2025-jıl ushın belgilengen áhmiyetli wazıypalar menen tanısıp, oqıw baǵdarlamaların jetilistiriw, jańa texnologiyalar hám ilimiy metodlardı qollanıw sıyaqlı áhmiyetli máseleler dodalandı.
Sonday-aq, oqıw procesin jáne de zamanagóylestiriw hám innovaciyalıq bilimlendiriw usılların engiziw zárúrligi atap ótildi.

Qaraqalpaqstan xabar agentligi