Respublikamızda xuqıqbuzarlıqlardıń aldın alıw, xalıqtıń tınıshlıǵın támiyinlew maqsetinde bir qatar jumıslar ámelge asırılmaqta.

Beruniy rayonı hákimliginde Ózbekstan Respublikası Prezidentiniń PQ-1-sanlı qararınıń orınlanıwın támiyinlew boyınsha rayon hákimi I. Xidirov hám sektor basshılarınıń qatnasıwındaǵı májiliste Prezidentimizdiń 2025-jılı respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin jáne de arttırıw ilajları haqqındaǵı qararınıń orınlanıwın támiyinlew máseleleri kórip shıǵıldı.
Bul baǵdarda profilaktika inspektorlarınıń jumısın túpkilikli jaqsılaw, orınlarda huqıqbuzarlıq, nızambuzıwshılıq jaǵdaylarınıń bolmawı ushın barlıq ilajlardı kóriw, jınayatshılıqqa qolaylıq jaratıp beretuǵın hár qanday faktorlardıń aldın alıw hám erte anıqlaw jumıslarına ayrıqsha itibar beriw áhmiyetli,- dedi rayon prokurorı M.Atajanov.
Rayonda 2023-jılı 10 máhálle jınyatshılıqtıń dárejesi boyınsha «qızıl» kategoriyaǵa kirgizilgen bolsa, 2024-jılı bul kórsetkish 6 ǵa túskeni atap ótildi. 2025-jılı jınayatshılıqtı ulıwma boldırmawǵa qaratılǵan ámeliy ilajlardı kúsheytiw zárúrligi atap ótildi.
Májiliste tiykarınan qarardıń mazmun-mánisi hám usı baǵdarda tiyisli «Jol karta»sın dúzip alıw, olar arqalı profilaktikalıq ilajlardı kóbeytip, máhállelerde jınayatshılıqtıń aldın alıwǵa erisiw ilajları kelisip alındı.

Qaraqalpaqstan xabar agentligi