Berdaq atındaǵı Qaraqalpaq mámleketlik universitetinde arttırılǵan immunitet jetispewshiligi sindromı (AIJS) hám arttırılǵan immunitet jetispewshiligi virusı (AIV) infekciyası haqqında úgit-násiyat jumısların alıp barıw baǵdarında taraw qánigeleriniń qatnasıwında ushırasıw shólkemlestirildi.
Ushırasıwda AIJSǵa qarsı gúresiw orayınıń baslıǵı Gúlzira Abilzaeva, oray shıpakeri Muxammed Izegenov hám oray xızmetkerleri Quwatbay Bekturganov, Sayora Jarievalar qatnastı. Dáslep taraw qánigeleri tárepinen AIJS hám AIV infekciyasınıń tarqalıw sebepleri, qáwip faktorları, kesellikten saqlanıw usılları hám onıń jámiyetlik aqıbetleri haqqında tolıq túsinik berildi.
Ásirese, juqpalı keselliklerdiń aldın alıwda gigiena qaǵıydalarına ámel etiw, salamat turmıs tárizin alıp barıw hám qáwipli jaǵdaylardan óz waqtında saqlanıw áhmiyetli ekenligi atap ótildi.
Ushırasıw dawamında studentler ózlerin qızıqtırǵan sorawlar menen múrájat etip, qánigelerden kerekli maǵlıwmatlardı aldı.
Ilaj sońında universitet studentleriniń arasında usınday úgit-násiyatlaw ilajların turaqlı ótkeriw zárúr ekenligi atap ótildi. Sonday-aq, barlıq qatnasıwshılarǵa salamat turmıs tárizi boyınsha arnawlı tarqatpa materiallar berildi.

Qaraqalpaqstan xabar agentligi