Bunnan aldınǵı xabarlarımızda Nókis qalasına «Sapsan Trans Nukus» juwapkershiligi sheklengen jámiyeti tárepinen derlik 11 mlrd. sumlıq qarjı esabınan lizing tiykarında Qıtay mámleketinen 12 dana «YUTONG» markalı zamanagóy avtobuslar alıp kelingeni haqqında járiyalaǵan edik.

Mine, búgin usı avtobuslardıń texnikalıq hújjetlestiriw jumısları óz juwmaǵına jetip, azanǵı waqıttan baslap, paytaxtımız xalqına xızmet kórsete basladı.
-Avtobuslarımız házirgi waqıtta test rejiminde «Nókis arqa-batıs avtovokzalı – Nókis qalalıq sawda kompleksi» jónelisi boyınshaxızmet kórsetpekte, deydi Qaraqalpaqstan Respublikası Transport ministriliginiń Málimleme xızmeti baslıǵı Zahida Qaljanova.-Atap aytqanda, Nókis arqa-batıs avtovokzalınan shıqqan avtobuslarımız, Shımbay gúzarı, Túyemoyın suw basqarması, E.Alakóz kóshesi boylap Oraylıq bazar,sońınan T.Qayıpbergenov kóshesi arqalı Mámleketlik salıq basqarmasınan burılıp A.Dosnazarov kóshesi boylap Temir jol vokzal arqalı aqırǵı bándirgi Nókis qalalıq sawda kompleksi yaǵnıy xalıq tilinde Kateks bazarına shekem háreketlenedi. Jolawshılardıń jol haqısı 2000 sum bolıp, avtobuslarımız 10 minutlıq interval menen azanǵı saat 7-00den keshki saat 21-00 ge shekem jolawshılarǵa xızmet kórsetedi. Usı jerde sonı aytıp ótiwimiz kerek, avtobuslarımız tek ǵana bándirgilerde toqtaydı. Sonlıqtan jolawshılardan avtobuslarǵa arnawlı bándirgilerde miniwin sorap qalamız.
Álbette, paytaxtımızǵa alıp kelingen bul avtobuslar tek ǵana qala xalqınıń emes, Nókis qalasına kelgen miymanlar ushın da oǵada qolaylı bolıp tabıladı.

Adilbay Orazov,
Qaraqalpaqstan xabar agentligi sholıwshısı