Sońǵı jıllarda, sud-huqıq máselelerinde táreplerdiń óz-ara jarasıwı, jarastırıw institutınıń jolǵa qoyılǵanı, sistemada milliy mentalitetke say háreketlerdi ámelge asırıw óziniń bir qatar unamlı nátiyjesin bermekte. Bul háreket qáwipli bolmaǵan, bilip-bilmey islengen jınayıy háreketler sıyaqlı jaǵdaylarda qollanıladı.

2024-jıl 26-dekabr kúni saat 09:30 lar shamasında Nókis rayonındaǵı Samanbay APJ aymaǵında “Kobalt” markalı avtomashinası menen Nókis rayonı «Úlgili mǝkan» MPJ «Nókis-Aqmanǵıt-Kegeyli-Qazaqdarya» 4 R 175 asfalt jolı boylap, qubla tárepten arqa tárepke qaray háreketlenip kiyatırıp Z.K. ismli shaxs, piyadalar ótiw ornınan kesip ótip atırǵan, erjetpegen T.Z.nı avtomashinasınıń aldınǵı bólegi menen dúgip aladı. Nátiyjede jábirleniwshi T.Z. jol-transport hádiysesi nátiyjesinde jaraqat alıp emlewxanaǵa túsedi.
Z.K. óziniń bul háreketleri menen Ózbekstan Respublikası Jınayat kodeksiniń 266-statyası 1-bóliminde kórsetilgen jınayattı islegen.
Bul is Jınayat isleri boyınsha Xojeli rayonı sudınıń baslıǵı S.Davletmuratov tárepinen Nókis rayonındaǵı ishki isler bóliminde ashıq kóshpeli sud májilisinde kórip shıǵıldı.
Sudlanıwshı Z.K. óz ayıbın tolıq moyınlap, pushayman ekenin bildirgeni hám jábirleniwshige jetkerilgen zıyan qaplanıp, jábirleniwshiniń nızamlı wákili tárepinen sudlanıwshıǵa keshirim bergenligi sebepli jınayat isleri boyınsha Xojeli rayonı sudınıń uyǵarıwı menen jınayat isi táreplerdiń óz-ara jarasqanlıǵı múnásibeti menen Ózbekstan Respublikası Jınayat Processual Kodeksiniń 84-statyasınıń 4-bólimine tiykarlanıp óndiristen qısqartıldı.

Qaraqalpaqstan xabar agentligi.