Sońǵı jıllarda elimizde, sonıń ishinde, respublikamızda ıssıxanalarda ónim jetistiriw jumısları jaqsı jolǵa qoyılıp, mine, bir neshe jıldan berli qıs máwsiminde de xalqımızdıń dasturxanlarına taza, jańa pisken ovosh hám basqa ónimler jetistirilip berilmekte.

Bıyılǵı qıs baslanǵan waqıtta ıssıxanalarǵa egilgen eginler de pisip jetilispekte.
Ámiwdárya rayonındaǵı “Manǵıt invest plyus” JShJǵa qaraslı 1 gektar maydandı óz ishine alǵan ıssıxana 2019-jılı Qıtay texnologiyası tiykarında iske túsirilgen bolıp, tiykarınan pomidor, qıyar ónimlerin jetistiriwge qánigelestirilgen.
Búgingi kúnge shekem bul ıssıxanada 55 tonnadan aslam ónim jetistirilip, ishki bazarlarǵa shıǵarılıp, aymaq turǵınların azıq-awqat ónimleri menen támiyinlep kelmekte. Sonıń menen birge, eksport kólemin arttırıw maqsetinde Qazaqstan hám Rossiya mámleketlerine de eksport etilmekte. Bul da óz gezeginde qosımsha dáramat dáregi esaplanıp, mámlekettiń eksport potencialın arttırıwǵa úles qosıwı menen áhmiyetli bolıp esaplanadı.
Bul ıssıxanada 7 adam turaqlı jumıs penen támiyinlengen bolıp, búgingi kúnde jetistirilgen ónimlerdi teriw jumısları qızǵın alıp barılmaqta.

Á.Jiyemuratov,
Qaraqalpaqstan xabar agentligi.