Búgin Berdaq atındaǵı Qaraqalpaq mámleketlik universiteti Qaraqalpaq filologiyası hám jurnalistika fakultetiniń filologiya hám tillerdi oqıtıw: (qaraqalpaq tili) bakalavriat tálim baǵdarınıń 2-3-kurs studentleriniń ámeliyat ótewi aldınan fakultet professor-oqıtıwshıları hám student-jaslardıń qatnasıwında ushırasıw shólkemlestirildi.
Ushırasıwda fakultet dekanı Q.Turdıbaev hám professor-oqıtıwshılar tájiriybe ámeliyatınıń áhmiyeti, onıń bilimlendiriw procesindegi ornı hám studentler ushın abzallıqların atap ótti.
Ámeliyat dawamında studentler teoriyalıq bilimlerin ámelde sınap kóriw, ózleriniń kásiplik kónlikpelerin rawajlandırıw hám taraw boyınsha real tájiriybe arttırıw imkaniyatına iye boladı.
Ilajda studentler ámeliyat dáwirinde ámel etiliwi kerek bolǵan ishki tártip-qaǵıydalar, pedagogikalıq wazıypalar hám juwapkershilikler haqqında tolıq maǵlıwmatlar aldı. Sonday-aq, professor-oqıtıwshılar student-jaslardı qollap-quwatlawǵa bárqulla tayar ekenligin bildirip, bahalı másláhátlerin berdi.
Qánigelik ámeliyatı studentlerdi keleshektegi kásiplik jumısqa puqta tayarlawda áhmiyetli basqısh esaplanadı. Ushırasıw dawamında student-jaslar ózlerin qızıqtırǵan sorawlarǵa juwap aldı.

Madina Jumabaeva,
QMU Qaraqalpaq filologiyası hám jurnalistika
fakultetiniń 2-kurs studenti.
Qaraqalpaqstan xabar agentligi.