Keshe Qatar paytaxtı Doha qalasında futbol boyınsha Ózbekstan milliy saylandı komandası jáhán chempionatınıń tańlap alıw basqıshında jaqsı oyınlar kórsetip kiyatırǵan Iordaniyaǵa qarsı joldaslıq oyının ótkerdi.

Bul oyın milliy saylandı komandaǵa jańadan bas trener bolıp tayınlanǵan Timur Kapadze ushın dáslepki ushırasıw bolıp, onda bas trenerimiz óz shákirtleriniń oyın ámeliyatın sınaqtan ótkerdi. Oyınnıń dáslepki taymında Bobir Abdiholiqov hám Azizbek Amonovlar tárepinen Iordaniya dárwazasın bir neshe márte nıshanǵa alınǵanı menen, olardan anıq nátiyje shıqpadı.
Ekinshi taymda Kapadze komandamızdıń 10 oyınshısın almastırdı. Atap aytqanda, dárwazaman Abduvohid Neymatovtıń ornına Botirali Еrgashev, futbolshılardan Dilshod Komilovtıń ornına Islom Qobilov, Farruh Sayfievtiń ornına Sherzod Nasrullaev, Oybek Bozorovtıń ornına Anvar Hojimirzaev, sońınan onıń ornına Jahongir Abdusalomov, Odil Hamrobekovtiń ornına Asadbek Rahimjonov, Jamshid Iskanderovtiń ornına Avazbek Wlmasaliev, Zafarmurod Abdurahmatovtıń ornına Saidazamat Mirsaidov, Bobir Abdiholiqovtıń ornına Jasur Yaxshiboev, Azizbek Amonovtıń ornına Ruslan Jiyanovlar oyınǵa túsirildi.
Al, Iordaniya saylandı komandası bas treneri bolsa oyın dawamında, tiykarǵı quramnıń altı oyınshısın almastırıwǵa qarar etti. Ushırasıwdıń ekinshi taymında Iordaniya saylandı komandası basımıraq oynadı. Degen menen ushırasıwda dárwazalarǵa gol urılmadı hám esap 0:0 esabı menen juwmaqlandı.

Adilbay Orazov,
Qaraqalpaqstan xabar agentligi sholıwshısı .